فاطنة لويزا – كود ///

ما عندنا حتى شك في أن محافظة الملك على العرف الدستوري ديال اختيار رئيس الحكومة من قائد الحزب لي تصدر الانتخابات، هاد المرة، كان عندو طعم خاص، حيت الملك ماداهاش فديك التخربيق ديال تحريم تولية النساء للمناصب العليا في الدولة، لي بغاو الخوانجية والسلفيين يسخنو بيه الطرح، ويديرو به الإرباك السياسي زعماكينا.
ولذلك فتعيين فاطمة الزهراء المنصوري مهم، ماشي فقط من جهة المحافظة على المنهجية الديموقراطية، ولكن من جهة بيداغوجية كتمثل في ان المغرب وصل لواحد المرحلة لي خاص نكسيريو فيها فيما يخص الحقوق ديال النساء.
لكن للأسف فاطمة الزهراء المنصوري لي كان مفروض هي الأولى لي تلتقط هاد الإشارات طبزات ليها العين، فاش بدات في استقبال ممثلي الأحزاب في إطار المشاورات التمهيدية لتشكيل الأغلبية الحكومية.
السيدة فاطمة الزهراء المنصوري عندها في القيادة الجماعية ديال الأصالة والمعاصرة سيدة أخرى، لي هي فاطمة السعدي، كيما عندها في الحزب سيدة كترأس المجلس الوطني للحزب، لي هي نجوى كوكوس، وهاد الزوج كان من المفروض انهم يكونو حاضرين في هاد المفاوضات واخا هي مفاوضات ديال جس النبض.
كانت غتكون إشارة سياسية بليغة، لي كتعني ان فاطمة الزهراء المنصوري فهمات الإشارة الملكية ديال التعيين ديالها.
ولكنها فضلات للأسف واحد السقوط في فخ الذكورية.
بانت مدورة بمجموعة من الرجال: عبد اللطيف وهبي وفوزي لقجع واحمد اخشيشن بجلابته.
بانت بحال اشي واحدة محتاجة للرجال الحكماء والخاترين ولي داو وجابو فالحياة السياسية زعماكينا.
لي بقا فيا، هو ان فاطمة السعدي ونجوى كوكوس ماشي غير زوج نساء عندو موقع متقدم في الحزب، واحدة عضو القيادة الثلاثية الجماعية، وواحدة رئيسة المجلس الوطني، ولكن انهم بزوج بيهوم عندوم تجربة وذكاء سياسي، وما جاوش بالدفيع، او انهم غير للديكور.
فاطمة السعدي كانت رئيسة واحدة من اكبر الجهات في المغرب، لي هي جهة طنجة تطوان الحسيمة، ونجوى كوكوس توجات المسار السياسي بالفوز بمقعد برلماني في دائرة من أقوى الدوائر في المغرب لي هي دائرة انفا، وهادشي بعد أن كانت رئيسة لشبيبة البام، قبل ما تولي رئيسة المجلس الوطني للحزب.
الخوف هو ان فاطمة الزهراء المنصوري بهاد الإقصاء تفكرنا مع مرور الأيام بواحد النوع من النساء لي هوما أكثر إقصاء للنساء من الرجال، ولي عندوم عقلية ذكورية.
الأكثر من ذلك ان تسريبات خرجات من البام كتقول ان فاطمة الزهراء المنصوري دارت خلية لتدبير المفاوضات داخل الحزب فيها المهدي بنسعيد، واحمد اخشيشن وسمير كودار وعبد اللطيف وهبي وفوزي لقجع فقط.
هادوا لي غيحسمو معها في المفاوضات، ماكاين ولو امرأة واحدة.
بيك يا وليدي كيما قال ديك الريفي.
المشكل ماشي غير فالبام، حتى الأحزاب لي استقبلها البام لحد الآن، حتى واحد ما جاب معه ولو امرأة واحدة، باستثناء التقدم والاشتراكية.
وعباد الله، واخا غير ديكور، جيبو معاكوم نساء الحزب.
حيت راه تناقض وسكيزوفرينيا كبرى.
كل هاد الأحزاب عبرات بعد الاستقبال الملكي لفاطمة الزهراء المنصوري على انها كتعتز بهاد المكسب لي تحقق للنساء، وانها ديما كانت كتدعم المشاركة السياسية للنساء، ولكن كتدعمها غير بالفم، عمليا فاللاشعور ديال كل قادة الأحزاب فيه ديك مقولة: شاوروهن ولا تعملوا بمشورتهن.
اما دابا حتى ديك شاوروهن ما كايناش.
التجمع الوطني للأحرار زعما لي كان اول حزب عطانا امرأة وزيرة في عهد الحسن الثاني، ولي للموضوعية فاش جا عزيز اخنوش استقطب بروفايلات نسائية قوية، ما فكرش الرئيس الجديد شوكي انه يجيب معه الوزيرة نادية فتاح العلوي ولا فاطمة الزهراء عمور ولا زكية الدريوش.
زعما والو حتى واحدة من هادو، مع العلم ان زكية الدريوش جايبة مقعد برلماني.
الاستقلال زيدهوم هلى هاد الميزوجينيين كلهم، حزب زعما لي جاي من الحركة الوطنية، لي حنة في وثيقة المطالبة بالاستقلال وفي عهد الحماية، فاش كان عدد النساء المغربية لي كيعرفو يفكو الخط، على رؤوس الأصابع، وسنات امرأة باسم حزب الاستقلال في تلك الوثيقة.
الحزب لي كيترأسو حفيد علال الفاسي، لي كان داعم قوي بتأثيره العلمي والسياسي لدعوات محمد الخامس من اجل تعليم النساء.
هاد الحزب حتى هو ما فكر فحتى امراة تكون حاضرة فهاد اللقاء، غير باش يبين انه فهم الإشارة الملكية.
ادريس لشكر لي فرع لينا الراس بدعم النساء، ولي الحزب لي استولى عليه كان اكبر حزب في الماضي دعما للحركة النسائية، وعطانا اول برلمانية فتاريخ المغرب مع الاستقلال، ما فكرش ادريس الرابع يجيب معه ولو امرأة واحدة، أسيدي واخا تكون بنتو، كان يهزها معه في طوموبيلتو فاش كان غادي لمقر البام، ولا انه يجي مع العجب العجاب،
وعلى ذكر ادريس، فمن نهار عين ميلودة حازب منسقة للقطاع النسائي بعد المؤتمر الأخير ديال الاتحاد الاشتراكي، ما بقينا شوفناها، معرفنا اشمن كاراج خزنها فيه.
الحركة الشعبية، هانية، واخا كاين امراة هي لي كتسير الحزب من خلف الكواليس، ولكن معمر الحركة النسائية كانت كتسنى شي حاجة من حزب ما زال باغي يردنا لزمن القبيلة، ولذلك فانا اوزين ما يجيب معه حتى امرأة يدخل في إطار: الحاجة لي ما تشبه مولاها حرام.
التقدم والاشتراكية هو الوحيد لي خاص النساء يقولو ليه: شكرا، على الأقل فهادي كان قد فمو قد الحركة ديالو، بان بلي نبيل بنعبد الله ماشي غير كيفهم فالإشارات، بل كذلك كيرد على إشارة بإشارة أخرى كتقول. البرقية وصلات.
المهم .. مبروك علينا وما زال مازال.