سهام البارودي كود ///

مؤخرا ناضو شي خوانجية محيحين فالفايسبوك قالك يجب إبعاد أحمد التوفيق عن وزارة الأوقاف و الشؤون الإسلامية. الحرب بين الخوانجية و أحمد التوفيق من شحال هادي و هي كاينة ماشي عاد ولات غي دابا مع حرب الاستوزار قالو آجي نستاغلو الفرصة و نآطاكيو داك السيد لي مبرزطهم ! و كايظلو يسبو فيه و يعرقو ليه و كايسميوه “وزير الأوقاف و الزوايا الصوفية” و كلشي عارف الكره العميق لي عند التيارات الإسلاميين للزوايا الصوفية فالمغرب و للمتصوفة بشكل عام.

الحرب على التوفيق من طرف الخوانجية سبابها الأساسي نزاع ديني، كايجيهم داك السيد داخل سوق راسو و طرونكيل بزاف، عازل الوزارة ديالو عن اللغط الدنيوي و السياسي لي هوما بغاو يدخلوه فيه بزز، مكرط اللحية و كايلبس الكوستيم و لا الجلابة المغربية، داكشي علاش كاينوضو يهللو على خطب الجمعة لي كايسيفط ليهم حول” الإخلاص” و “أضرار التدخين” كايجيهم داكشي سوفت ماكرهوش شي خطب “رنانة” على شاكلة الخطب ديال أبو الدحداح فولاية الرقة و لا كاع يحيد هوا الخطب و يخلي ليهم التيران خاوي و ديك الساعة جيب يا فم و قول نخليو الأئمة يهضرو فماوالاهم و كل واحد حسب فهمه للدين. بالعربية تاعرابت الخوانجية كايقولو على التوفيق ماعندوش الأواني النحاسية لي حسب المنظور ديالهم خاصهم يكونو عند وزير الشؤون الإسلامية فالمغرب، ماكرهوش شي واحد من صحابهم و حبذا يكون صابغ لحيتو لي على شكل شطابة بالحنا يبقا ينقز و يهلل و يغوت فوق المنابر يدير الترهيب و الترغيب، دوك “الدعاة” الجدد لي بانو مع الفكر الوهابي، بغاو الخطب ديال الجمعة تكون فيهم “اكشن” و يناقشو السياسة و الأمور الاجتماعية يمارسو التسييس ديال الدين فراحتهم مايديرونجيهم حد.

الخوانجية كاينساو شي مرات بلي كاينة مؤسسة فالمغرب سميتها “إمارة المؤمنين” و لي هي براسها و بكل الثقل لي عندها ختارت أنها تنأى عن نفسها على كل الصراعات الدنوية و المشاكل السياسية، فعهد محمد السادس ماعمرنا شفنا مؤسسة إمارة المؤمنين داخلة فشي لغط سياسي و لا اقتصادي و الدور ديالها كايقتاصر على الجانب “الروحي” فحياة المغاربة.

و هاد “الجانب الروحي” بالضبط هو لي كاديرونجي الخوانجية و ماكايحملوش يسمعوه، علاش؟ حيت هوما مابغاوش الدور ديال المساجد يقتاصر على “الجانب الروحي” عزيز عليهم يدخلو الشكلي فالعكلي و بغاو يخرجوا الجوامع من السلم لي هوما فيه اليوما و يردوهم مراتع للفكر الوهابي الظلامي و مراكز لتفريخ الارهابيين فحال لي واقع فبزاف ديال الدول و ماشي غي الاسلامية حيت فأوروبا مثلا و لي مافيهاش أحمد التوفيق كاتلقا شحال من ارهابي تفركع فلندن و لا باريس و لا امستردام كان كايدوز وقتو كامل فالجامع، شنو كايقولو ليه تما؟ باش كايعمرو ليه راسو؟ شنو كايسمع؟ أكيد ماشي شي خطبة على”أضرار التدخين”.

الخوانجية بجانب أنهم كاينساو شي مرات بلي كاينة مؤسسة سميتها إمارة المؤمنين كاينساو حتى بلي المغاربة مسلمين و كانو مسلمين قبل مايبان البارابول و يبانو معاه قنوات “إقرأ” و “المجد” و الناس، و الفقها ديما عاشو معانا بيخير معززين مكرمين كايتهلاو فيهم الناس شبعانين مع راسهم كسكسو فالجنازات و لحم و برقوق فالسبوعات و دغميرة د الدجاج، و مادااا في قبك سااااخيينووون **** إلى الزنقة قاااسيمووون

و العلاقة ديال المغربي مع الفقيه علاقة احترام كاتلخص فيبوس ليه راسو و يجيب ليه الطاس باش يغسل يديه مورا مايكون ضرب واحد مولاتي الكصعة ديال كسكسو الحرارة ديالها واصلة لخمسين درجة سيلسيس.

الخوانجية بغاو يخرجو الفقها بزز من الطوابل ديال كسكسو و يدخلوهم فشي معمعة لي غاتسالي بيهم فأفغانستان و لا سوريا و لا غاتسالي بينا فشي حرب أهلية.

اليوم الصراع على شكون غايشد وزارة الأوقاف و الشؤون الاسلامية صراع متجاوز، ماعندوش أولوية غي باغين يخوفشو بيه على المغاربة، حيت المغاربة ماعندهمش مشكل مع “التوفيق” و مع الفقها و مع الجوامع، المغاربة عندهم مشكل مع الخبز، و المدرسة و السبيطار …

نحلو هاد المشاكل بعدا و يحن الله.