گود سبور//

كايبان أن الدولي المغربي أشرف حكيمي لاعب باريس سان جرمان الفرنسي كايعاني من الإصابة وهاذ الشي قبل شهر ونص تقريبا من كاس العالم 2026.

أشرف حكيمي اللي قدم مستوى مزيان فماتش ذهاب دومي فينال دوري أبطال أوروبا مع باريس سان جرمان ضد بايرن ميونخ اليوم الثلاثاء، وعطى أسيست الهدف الرابع، طاح فالدقيقة 88 فالأرض، وكان باين عليه الألم قبل ما يكمل الماتش حيث الفرقة ديالو كملو التغييرات.

وملي صفر الحكم نهاية الماتش اللي ربحوه باريس سان جرمان بنتيجة 5-4، شدات الكاميرا اللعابا صحاب أشرف حكيمي وهما كايسولوه واش صافا.

موقع madeinparisiens.ouest-france قال إن الساعات اللي جايا غادي يتعرف بها شنو عند أشرف حكيمي واش إصابة ولا غير تشنجات عضلية، مع العلم أن اللاعب السبت اللي فات ما قدرش يكمل ماتش باريس سان جرمان ضد انجي حيث حس بشي ألم ملي بغا يجري وما كملش الشوط الاول، قبل ما يرجع يتريني مع الفرقة البارح الاثنين.