كود سبور//
ما غايكونش الدولي المغربي اشرف حكيمي لاعب مع المغرب فالماتش الجاي بين المنتخب الوطني المغربي ومنتخب تنزانيا، برسم الجولة 6 من اقصائيات كاس العالم 2026.
وغايب اشرف حكيمي كابيتان المنتخب المغربي على الأسود ضد تنزانيا، حيث جمع 2 بطاقات صفرين فالماتشات اللي فاتو، الثانية خداها البارح فالماتش ضد النيجر البارح الجمعة فالجولة 5.
مصدر من المنتخب المغربي وضح لجورنال “گود”، أن السبب اللي خلى وليد الركراكي يعيط على الظهير الأيسر يوسف بلعمري للمنتخب المغربي فالماتش ضد تنزانيا هو غياب الظهير الايمن اشرف حكيمي.
ومن المنتظر يرجع الركراكي، نصير مزراوي كظهير ايمن ضد تنزانيا وهو البوسط ديالو المتعود يلعب فيه، ويحسم فشكون يلعب كظهير ايسر واش يوسف بلعمري اللي عطي له، او يعطي الفرصة للاعب الصغير ادم ازنو.
