كود سبور//

يتواصل الجدل حول الاختيارات اللي دارها الناخب الوطني وليد الركراكي فلائحة المنتخب الوطني المغربي اللي كان عيط لها للمشاركة فكاس افريقيا اللي فاتت، وحتى الاختيارات ديالو للاعبين اللي شارك بهم فالماتشات وسط البطولة، ومن بينهم اشرف حكيمي نجم باريس سان جرمان الفرنسي، واللي ما كانش فالفورما فالكان حيث كان راجع من إصابة، وهنا الجدل كايحوم حول الجاهزية ديالو، وهذا زاد دابا بعد تصريح الإسباني لويس انريكي مدرب PSG، اللي اكد ان اللاعب المغربي خاصو يرتاح.

وخلال الندوة الصحافية اللي كاتسبق ماتش باريس سان جرمان وأولمبيك مارسيليا ضمن بطولة فرنسا، وهو الماتش اللي غايب عليه اشرف حكيمي حيث كان هدا حمرا فالماتش اللي فات ديال PSG، هضر لويس انريكي عليه وقال: “اول حاجة محتاجها اشرف حكيمي هي الراحة، لعب بزاف فكاس افريقيا بعد إصابة خطيرة”.

وكمل لويس انريكي، وقال: “خاصو يرتاح باش التفكير ديالو يصفا وما يبقاش مشوش ويرجع الشغف ديالو بالكورة، وهذا اهم حاجة عنا، وغادي ياخد الراحة وما عرفتش شحال من يوم بالضبط، وحكيمي غايكون لاعب حاسم بالنسبة لنا ولكن اللي بغينا هو اللاعبين كاملين يكونو فأحسن حالة”.

وللإشارة فعدد من لاعبين المنتخب الوطني المغربي، توعتو فكاس أفريقيا وهذا كايبين ان فيهم اللي ما كانوش واجدين بدنيا بحال رومان سايس وإلياس بنصغير وحمزة إگمان ومنير المحمدي، وكاين فيهم اللي عيط لهم الركراكي وهما موعتين وكاينين اللي عيط لهم وهما ما عندهمش تنافسية، من غير اللي دارو عمليات بعد كاس أفريقيا بحال سفيان امرابط وحمزة إيگمان.