كود – كازا //

حسمات الهاكا الصداع اللي كان داير على مسلسل “بنات لالة منانة”، وقررات تسد جميع الشكايات اللي توصلات بها على قبل هاد العمل الدرامي اللي تعرّض فرمضان اللي فات.

وقالت الهيئة باللي عيطات وبلغات جميع الأطراف اللي دارو الشكايات، سواء كانوا أفراد ولا جمعيات، واللي كانو كيشوفو باللي شي مشاهد ولا حوارات فالمسلسل فيها مضامين كتمس بالقيم ديال المجتمع.

وجا هاد القرار من بعد دراسة مزيانة ودقيقة للمسلسل، فين وصلات الهيئة لنتيجة باللي العمل ما فيه حتى مخالفة للقوانين اللي كتنظم حرية التعبير الفني ولا القواعد ديال قطاع السمعي البصري.

وزادت وضحات باللي المسلسل كيدخل فالإنتاجات الدرامية الخيالية، اللي كتعبر على اختيارات إبداعية ديال صناع العمل، سواء فطريقة الكتابة ولا الإخراج.

وأكدات حتى باللي هاد النوع من الأعمال خاصو يكون فيه واحد الهامش ديال الحرية فبناء الأحداث وطريقة تقديم الشخصيات، حيث هاد الشي ضروري باش تكون عند العمل قيمة فنية وإبداعية.