كود – وكالات //

واش سمعتي شي نهار بلّي الرجال عندهم حتى هوما دورة شهرية؟ غالبًا الجواب غيكون “لا”، ولكن العلم كيقول حاجة اخرى ، الرجال ما عندهومش دورة شهرية بالمعنى لّي نعرفوه عند المرأة، ولكن أجسامهم كتعيش تقلبات هرمونية يومية حقيقية كتأثر على مزاجهم وطاقتهم ورغبتهم الجنسية ، وهاد الظاهرة كيسمّيها الباحثين  “دورة التستوستيرون اليومية”.

هرمون التستوستيرون، لّي هو هرمون الذكورة ، ما كيبقاش ثابت طول النهار، دراسات نشرتها مجلة Clinical Endocrinology كشفات بلّي مستوى التستوستيرون فالصباح بكري كتكون طالعة بـ 25 تال 50 بالمية مقارنة بالعشية وهاد الفرق كبير كافي باش يأثر على سلوك الرجل وإحساسهم فالصباح، الرجل كيحسّ بنشاط وتركيز وحيوية، وكتزيد رغبتهم الجنسية ،و مع  النهار كيدوز، التستوستيرون كيبد  يهبط تدريجيًا، وكيجي معاه الإحساس بالعيا  والنعاس وقلة الحماس.

اللّي كيزيد يعقد القضية هو أن هاد الهرمون ما كيتأثّرش غير بالوقت ، كاين حتى الضغط النفسي لي كيهبط  التستوستيرون بشكل ملحوظ، وأبحاث جامعة Northwestern الأمريكية بيّنات بلّي الآباء الجداد كيعيشو انخفاضًا في التستوستيرون كيوصل لـ 30 بالمية في الأسابيع الأولى بعد الولادة ،هاد التطور البيولوجي كيعاونهم على الاهتمام بولادهم.

مورا 30 عام، التستوستيرون كيبدأ ينقص بمعدل 1 إلى 2 بالمية كل عام حسب Mayo Clinic،وفاش كيوصل الرجل للأربعينيات والخمسينيات، كيدخل فمرحلة لّي كيسمّيها الأطباء “Andropause” أو سن اليأس الذكوري ، وهي مختلفة على ديال المرأة لأنها ما كتجيش فجأة، ولكن بسزية وعلى سنين، تقديرات كتقول بلّي  30 بالمية من الرجال فوق 50 عام كيعانيو من أعراض هاد المرحلة لي فيها تقلب فالمورال، صعوبة في التركيز، زيادة الوزن، وضعف الطاقة.

الخبر الزوين هو أن الجسم كيسطتجاوب مزيان مع التغييرات البسيطة و الرياضة المنتظمة، النوم الكافي، والأكل الصحي كيقدرو يعاونو على التوازن الهرموني لسنين طويلة ، والعلم اليوم كيأد بلّي هاد العوامل مهمة للرجل بنفس القدر لّي هي مهمة للمرأة.