وكالات//

الرئيس الميريكاني جو بايدن خدا دوز جديدة من فاكسان جديد ديال كورونا، وطلب من المواطنين الميريكانيين أنهم يديرو هاد لادوز باعتبارها تنشيطية قبل ما الموسم ديال الشتا لي جاي.

وقال بايدن خاص الميريكانيين ياخدو هاد دوز في أقرب وقت، وخصوصا الناس لي كبار في السن لي بحالي، لأنه أكثر ناس مهدديين باش يأثر عليهم الفيروس واخة يكون خفيف.

الخروج ديال بايدن جا من بعدما الميريكانيين ما بقاوش باغين يمشيو يديرو اللقاح، وقال الرئيس بأن هادشي أسبابو حسابات سياسية.

بايدن قال أن الصحة ديال الميريكانيين مهمة وبعيدة كل البعد على الحسابات ديال الأحزاب، لأن كورنا قتلات مليون مواطن في الموجات الأولى ديالها.

وجات هاد لادوز لي دار بايدن بعدما علنات منظمة الصحة العالمية والمركز الأوروبي لمكافحة الأمراض والوقاية منها أن موجة جديدة ديال كورونا غادي تضرب أوروبا.

الأرقام لي علنات عليهم منظمة الصحة الميريكانية أكدو أن عدد الإصابات في كورونا في الأسبوع شهر 10 تزادو ب10 في المائة.