گود سبور//

غادي يلعبو البارصا ماتش فالمغرب الصيف الجاي، حسب ما قالت وسائل إعلام إسبانية.

وكشفت جريدة “موندو ديبورتيفو” القريبة بزاف من البارصا، ان الفريق غادي يلعب فالمغرب ماتش ودي إعدادي داخل ضمن استعداداتهم للموسم الجاي.

الجريدة الإسبانية وضحت ان البارصا غادي يجيو يلعبو فالمغرب يوم 14 غشت الجاي، بلاما يقول شكون الفريق اللي غادي يلعبو ضدو.

نفس المصدر وضح ان البارصا غادي يكون عندهم معسكر فالنگليز، ومن وراها غادي يمشيو لنيروبي فكينيا يلعبو ماتش ودي ضد فريق أوروبي كبير يوم 9 او 10 غشت، ومن تما غادي ريجعو بحالهم لبرشلونة، وغادي يخطفو رحلة دغيا للمغرب يلعبو يوم 14 غشت ماتش ودي.

للإشارة فمن العام اللي فات وهي كاتروج اخبار على ان البارصا غادي يجيو يلعبو فالمغرب، وان هشام ايت منة رئيس الوداد الرياضي كان غادي يجيبهم يلعبو الصيف اللي فات ضد الحمرا، غير هو دابا راه الوداديين كايطالبو بالرحيل ديالو.