كود بنگرير ///
فاللقاء الاستراتيجي 4 فجامعة محمد السادس متعددة الاختصاصات فبنگرير اللي تابعة للمجمع الوطني للفوسفاط٬ اللي بدا البارح السبت 19 ابريل 2025 وسالى اليوم الاحد 20 ابريل٬ كشف وزير التربية الوطنية والتعليم محمد سعد برادة باللي 160 الف تلميذ فالمرحلة الاعدادية ديال لقراية كيغادر. اي جيش كبير كتجري عليه المدرسة العمومية فمرحلة المراهقة. هاد الشي خطير وبزاف ديال الهدر المدرسي.
لكن قبل ما يتكلم لوزير على هاد الشي وعلى دور مدارس الريادة فمحاربة الهدر المدرسي٬ كان اطر اعدادية بني نصار من الناظور٬ قدمو وسط الحضور تجربتهم معززة بفيديوات. اعدادية كان فيها كاع مشاكل التعليم فالاعدادية: الهدر. مشاكل التلقي. ادوات التدريس. مناهجو. لكن بعد ما ولات هاد الاعدادية من “مؤسسات الريادة” بحالها بحال 232 مؤسسة٬ تبدل كلشي. دخلات الفنون من مسرح وسينما. دخلات الرياضة. دخلات ورشات المواطنة وحقوق الانسان…. ولات لقراية محبوبة كيف شرحو اطر المنطقة واساتذة المؤسسة.
شهادة زوينة لتلميذ كيلخص هاد لشي. قال ففيديو داز قدام الحضور باللي المدرسة ولات “بحال ايلى كيلعب فيها ماشي كيقرا فيها”. تصورو لولاد اللي كانو بحال اقرانهم كيكرهو المدرسة ولات عزيزة عليهم. كيسولو “صافي سالات الحصة” عوض معاش خارجين. استاذ قال فشهادتو باللي فهاد الاعدادية اللي كانو فيها وحدين غاديين ينضمو ل160 الف تلميذ =الهدر المدرسي= ولاو فاعلين فالمحترفات وتحسنات نقطهم٬ قال بللي القاعدة ولات “كتعلم كيفاش تتعلم”.
دابا واش هاد التجربة ديال بحال اعدادية بني نصار فالناظور تنقذ التعليم فالاعدادي اللي وصفو وزير التعليم باللي “المشكل الاكبر فالتعليم” بسباب دخول التلاميذ مرحلة المراهقة ومع ما ينضاف من مواد فهاد المرحلة. الوزير متفاءل. بالنسبة ليه “نعم ممكن نجحو” ولكن كفريق واحد.
قال باللي تجربة بحال بني نصار غادية تتعمم على 50 بالمائة من اعداديات المغرب قبل نهاية الولاية الحكومية الحالية.
