كود الرباط//

نايضا فالسوشل ميديا هاد الأيام حول تصريحات رئيس الجمعية المغربية لحقوق الإنسان عزيز غالي، اللي اتهم فيها وزارة الصحة بالتواطؤ في نشر دم ملوث بالسيدا انطلاقا من مركز تحاقن الدم بالدار البيضاء، هادشي ف2019.

فيديوهات كثيرة تخدات من تصريحات غالي حول الدم الملوث في برنامج على اليوتيب مع المهداوي، هادشي وفق مصادر “كود” دار استنفار بوزارة الصحة.

مصادر فالوزارة استغربت كيفاش غالي هضر دبا على الدم الملوث بالاعتماد على تقرير غير معروف، وربطو بالوزير خالد أيت الطالب، علما أن غالي كيقول بلي التلوث وقع فشهر 7 سنة 2019 وتم تنصيب آيت الطالب وزيرا للصحة في أكتوبر 2019.

ومن المتوقع أن تتجه وزارة الصحة إلى رفع دعوى قضائية ضد رئيس الجمعية المغربية لحقوق الإنسان بخصوص تصريحاته التي أثارت مخاوف صحية لدى المغاربة.

غالي قال بلي عندو تقرير يفيد بلي دم فيه السيدا توزع على مستشفى عمومي وكلينيك بريفي.

مصادر بالوزارة كذبات هادشي وأكدت لـ”كود” بلي اللي كيتحكم فالدم هو الالات ماشي انسان باش يتم التلاعب فيه، والدم لي فيه السيدا أو ملوث كيتلاح اوطوماتيكيا.

وشددت ذات المصادر لـ”كود”: “آلة كتحكم فالدم وميمكنش يتم التلاعب فيه، الدم اللي ماشي صالح كيتلاح بطريقة أوتوماتيكية”، مؤكدة بلي الدعوة اللي رفع غالي للنيابة العامة هي غادي تكشف حقيقة هادشي ملي غاي غايتبين التقرير اللي تم الاعتماد عليه.