هناء ابو علي – كود//
الصحف الصربية فرحانة اليوم و هي كتنشر صور وزير الخارجية بوريطة مع نظيره الصربي ف لقاؤهم ووصفات العلاقات المغربية الصربية بانها عبارة عن شهر عسل رغم انها اول زيارة رسمية من 14 سنة.
الصحافة الصربية احتفلات بزاف بتصريحات بوريطة اللي اكد ان المغرب ماعمرو غادي يعترف باستقلال اقليم كوسوفو و انه كايحترم الوحدة الترابية لصربيا.
الجدير بالذكر ان المغرب وخا شارك ف مهمة ديال القبعات الزرق ف كوسوفو ومشا مع الدول الغربية ف دعم المسلمين الكوسوفويين و البوسنيين ف الحرب الاهلية اللي ضربات المنطقة فان صربيا وهي وريثة للسياسة الخارجية ديال يوغسلافيا السابقة ماعمرها اعترفات بالبوليساريو وخا كانت دولة شيوعية بالاضافة الى ان موقف صربيا من تنظيم كأس العالم و تصويتها لصالح المغرب – على عكس البوسنة المسلمة صوتات لصالح الملف الامريكي الكندي- كل هادشي يمكن خلا الموقف المغربي يكون صارم ويرجع مع الوحدة الترابية الصربية كرد للجميل.
