مصطفى لمزابي كود ابن احمد //
واش بولحية طلع هو سفاح حمداوا؟ دابا هو المشتبه الوحيد فيه فجرائم قتل. لحد الان راهم جوج. على حساب معطيات حصرية جابتها “كود ” ، بولحية مول الطواليط للي قريبة من الجامع الاعظم فمدينة بن حمد بقى ساكت. ضرب الطم باش هدر مع المحققين. حسب مصادر “كود” من عائلة الضحايا٬ واخا واجهوه بنتائج الخبرات العملية ضرب الطم وما هدرش.
لقاو عندو اشلاء بشرية فالتواليط اللي كيشرف عليها فالمسجد الأعظم وفين ساكن وفشي ارض فلاحية قريبة من ساكن. لقاو مواس. يعني لمضا ووالو بقى ساكت.
لحد الان حسب نفس مصادر “كود”٬ يالله عتارف باللي لمضا اللي لقاوه فمسرح الجريمة ديالو وباللي اللباس اللي لقاوه حدا دارو حتى هو ديالو. الباقي ضرب الطم.
مازال ما بغاش يهدر حسب مصادر “كود”٬ على الما قاطع اللي لقاو عندو ولبيبيستيسير االلي فدارو. كاليهم كنظف بيها داري وصافي. وداك الدم االلي لقاوه فحوايجو ورجليه باش شدوه وديك الجروح اللي عليه. هادي حتى هي ما بغاش يجاوب عليها
