الوالي الزاز -كود- العيون////
[email protected]
السؤال اللي مطروح فخضم الزيارة اللي كيقوم بها وزير الشؤون الخارجية والتعاون الأفريقي والمغاربة المقيمين في الخارج، ناصر بوريطة للولايات المتحدة الأمريكية، هو واش غادي يتلاقى الامين العام للأمم المتحدة، أنطونيو گوتيريش ؟
هاد السؤال مشروع أنه يتحط بحكم قرب إنعقاد جلسة مجلس الأمن الدولي حول الصحراء النقررة يوم الاثنين المقبل الموافق لتاريخ 14 أبريل 2025، وكذلك بحكم أن اللقاء مع الأمين العام للأمم المتحدة شحال عادي ما دارش، وايضا بحكم تواجد بوربطة فميريكان اللي فيها مقر الأمم المتحدة.
الجواب على هاد السؤال هو أن وزير الشؤون الخارجية والتعاون الأفريقي والمغاربة المقيمين في الخارج، ناصر بوريطة، ما غاديش يتلاقى الأمين العام للأمم المتحدة، أنطونيو گوتيريش بسباب أن الامين العام واخد الكونجي السنوي ديالو على حساب ماهو مذكور فالأجندة اليومية ديالو.
اللقاء فالأصل بين ناصر بوريطة وگوتيريش فهاد الوقت ما عندو داعي، وداكشي اللي غادي يقول ليه بوريطة ديجا تقال لمبعوثه الشخصي لنزاع الصحراء، ستافان دي ميستورا، فاش جا للمغرب، وبالتالي فإن برمجة لقاء مع الأمين العام ماشي شي حاجة مُلحة وضرورية فهاد الوقت، خاصة وأن الوضع عادي وما كاين حتا مستجد يستدعي هاد اللقاء.
الضروري كان هو زيارة ناصر بوريطة للولايات المتحدة الأمريكية والبحث عن إدلاء الإدارة الأمريكية العضو الدائم بمجلس الأمن الدولي وصاحبة القلم اللي كتصيغ قرارات مجلس الأمن بموقف واضح وبلغة مباشرة بخصوص النزاع والتعبير بشكل صريح عن دعم مغربية الصحراء وهادشي وقع بالفعل وجاب معاه رد فعل جزائري ناعم فرش خوفها من ردة فعل أمريكية.
