كود سبور//

غريب وعجيب، هذا اقل ما يقدر يتقال على قرار نقل ماتش اتحاد التواركة والرجاء الرياضي ضمن الدورة 9 من البطولة الاحترافية، من تيران المدينة اللي كانو ملعوبين فيه ماتشات كاس افريقيا فالرباط، إلى تيران الخميسات اللي ملي عقلنا عليه وهو حالتو.

وأعلنت العصبة الوطنية لكرة القدم الاحترافية اليوم الجمعة فالعشية، انه تقرر تغيير ملعب إجراء مباراة اتحاد تواركة الرياضي أمام الرجاء الرياضي.

العصبة الاحترافية قالت ان هذا القرار جا نظرا لعدم استكمال الإجراءات الإدارية وبطلب من إدارة نادي اتحاد تواركة الرياضي.

وغادي يتلعب الماتش يوم الأحد 25 يناير 2026، مع 6 العشية، بملعب 18 نونبر بمدينة الخميسات بدل ملعب المدينة بالرباط كما كان مقررا سابقا.

راه خاص يعرفوه المسؤولين ديال اتحاد التوارگة وحتى المسؤولين ديال العصبة الاحترافية لكرة القدم، ان المغرب والجامعة الملكية المغربية برئاسة فوزي لقجع راه انخرطوا فتنظيم الاحداث الرياضية الكبرى بحال كاس افريقيا وكاس العالم من اجل الرفع من جودة البنية التحتية بالمملكة، ومن بينها التيرانات، ويبقاو يستافدو منها المغاربة والأندية الوطنية والمنتخبات الوطنية، ومزيان يتلعبو ماتشات اخرين فمدن أخرى بحال الخميسات ولكن بشرط يتصلح الملعب ديالها ونادي الاتحاد الزموري يكون هو الاولى بالاستفادة من التيران ديالو، ماشي فريق اتحاد توارگة يخلي ملاعب الرباط اللي 4 منها شاركت في تنظيم ماتشات كاس افريقيا وبجودة عالية ويمشي يستقبل فمدينة أخرى.