كود – طنجة //

طلعات تراند واحد السائحة مركيانية كتبكي فلابلاج ديال طنجة  بوحدها وهي جيعانة، بسبب الجو اللي كيكون فـشهر رمضان فالمدينة على مكتقول.

https://www.instagram.com/reel/DVbboF2jCLf/?igsh=djlhamp2cWVzeXFy

الگاورية لي اسمها  Josie stoffan قالت  باللي فاقت مع الصباح ولقات كلشي مسدود، ودارت دورة فطنجة كتقلب على شي محل ولا مطعم باش تاكل شي حاجة ولكن بلا فايدة، حتى مشات لوطيل فين صايبو لها ما تاكل.

البنت وضّحات باللي بكات ماشي غير بسباب الجوع، ولكن  حيث ما كانش عندها الكاش وما قادراتش تخرج الفلوس من الݣيشي الأوتوماتيكي، وقالت بلي گاع البلايص كيتعاملو غير بالكاش الشي لي زاد عقد عندها الامور .

“ستوفان”مشات لابلاج،فين ݣلسات وبقات كتبكي بوحدها ومن بعد نشرت فيديو كيوثق اللحظة الصعيبة اللي دازت منها، وتفاعلو معاها بزاف ديال الناس.

وخا أنها قالت باللي كتفّهم أجواء رمضان وكتحمّل راسها مسؤولية حيث ما كانتش عارفة من قبل، ولكن هاد الواقعة كتبين كيفاش كتكون طنجة فالصباح ديال رمضان، مدينة  كتصفر وكلشي مسدود سوا مطاعم ولا قهاوي ولا محلات هادشي لي  كيأثر على الخدمة وعلى السياحة لطنجة وفالمغرب.

هاد الوضع  حسب متابعين كيبان متناقض مع الطموح ديال البلاد باش تولّي وجهة سياحية كبيرة، خصوصاً وأن بزاف ديال الدول الإسلامية فـرمضان كيبقاو محلاتهم ومطاعمهم محلولين للسياح، مع احترام معتقدات الجميع، اللي بغا يصوم يصوم، واللي بغا ياكل ياكل.