كود الرباط//
دايرا حرب كبيرة ضد الدولة، ضد قرارها السيادي بتقليص سنوات دراسة الطب من 7 سنين إلى 6 سنوات مع تكثيف ساعات التداريب والتكوينات، باش يتخرجو عدد أكبر وبكفاءة مضمونة، هاد الحرب شاعلينها كثر بزاف ديال المؤثرات والمؤثرين وصحاب الفلوس خصوصا لوبي الأطباء فالقطاع الخاص.
اللي خطير هو أن من هاد المعارضين لهاد القرار، كاين لي كيحضر فأنشطة رسمية، بحال ديك المؤثرة الإخوانية إحسان بنعلوش، للي عندها ولاء لحركة حماس، للي جابها وزير التربية الوطنية شكيب بنموسى باش دير تأطير فشي ورشة غبية للأساتذة. اليوم كاتعلن دعمها للعصيان للي دايرين بعض طلبة الطب ضد الحكومة.
قلناها ف”گود” مرارا، هذا ماشي احتجاج عادي، هادشي راه لعب كبير موراه لوبيات هدفهم يبقا الوضع كما هو، منهم أطباء ملايرية باغين ولادهم يكملو القرايا فأوروبا خصوصا فرنسا، للي بغا يحتج من حقو ولكن ماشي يفرض على باقي الطلبة خيار المقاطعة.
اليوم، هاد ممثلي طلبة الطب خصهم يجاوبو مؤسسة الوسيط على الاقتراحات لي تعطات ليهم، فحالة جاوبو فالرفض فراه مابقاش قدام الدولة إلا خيار فرض الأمر الواقع وفرض الإصلاح البيداغوجي الجديد بقوة القانون يعني للي بغا يقرا مرحبا به وللي بغا يرفض ويدير الاحتجاج يمشي من حقو غير مخصوش يحرض ضد اللي بغاو يقراو.
يشار بلي مؤسسة الوسيط عطات اقتراحات وضمانات لطلبة الطب باش يدوزو الامتحانات نهار 4 أكتوبر ويتحيدو العقوبات الإدارية على عدد من الطلبة لي دارو الاحتجاجات.
اقتراحات مؤسسة الوسيط قبلات بها وزارة التعليم العالي، منها طبعا العقوبات يتحيدو غير يجيو الطلبة ويدوزو الامتحانات، ويدار امتحان فكل دورة للاستداركية.
بعض ممثلي طلبة الطب رافضين مقترحات مؤسسة الوسيط، ولكن فنفس الوقت غايمشيو يتشاورو مع بعضياتهم باش يعطيو جواب لمؤسسة الوسيط.
الوسيط كتسناهم يعطيو جواب واضح، على المقترحات لي جاب، باستثناء قضية تقليص سنوات الدراسة لي هو قرار سيادي لا رجعة فيه ولا مناقشة فيه، وهو القرار لي رافضينو ممثلي الطلبة.
وحسب مصادر داخل مكاتب الطلبة، فراه كاين ممثل طلبة وجدة هو لي كيشعل فهاد الفتنة ويزيد فالتحريض لأنه أصلا عندو شي قضية فالقضاء وعارف راسو خاسر خاسر، وهذا محسوب على البي جي دي ومقرب من قيادي عضو فالأمانة العامة للبي جي دي.
لي رافضين تقليص الدراسة وكيحرضو، سالا مستقبلهم العلمي والمهني وحتى فرنسا لي كيحلمو بها مغاديش تقبلهم وفق مصادر “كود”، بحيث صافي تكتب ليهم ف الشواهد ديالهم هادشي لي دارو وملاحظات في ملفاتهم.
