كود سعيد الشاوي //

هاد ليام وصلات خبار عند شركات “ليڤيمونسيال” فيها باللي مارشي فان زون” =الفضاءات المخصصة للجمهور كديرها الدولة باش يتفرجو فالماتشات= باغي يتكلف بيه مهدي بنسعيد وزير الثقافة والاتصال والشباب. باغي يدخل ليه من قطاع الشباب.

سولات “كود” مصادرها واكتفو بالقول باللي غير هدرة كانت وباللي مازال ما كاين والو. يعني ان الموضوع فوق الطاولة وان الوزير اللي فنفس الوقت من القيادة الثلاثية لحزب الاصالة والمعاصرة٬ طامع فهاد المارشي. طبعا هادي فضيحة كبيرة. اولا بنسعيد ما عندو حتى شي علاقة بتنظيم كأس افريقيا للامم اللي غادي نظموها فبلادنا. ما هو وصي على قطاع الرياضة٬ اي وزارة التربية الوطنية والتعليم الاولي والرياضة٬ ولا هو عضو فاللجنة المنظمة للكان. اكثر من هاد الشي٬ فحسب تسريبات٬ فحتى مارشي هاد “الفان زون” معروفة الشركة اللي غادية تاخدها وهي “اڤان سين” ديال ابيدزير. هاد الشركة اللي خدات مارشي العام اللي فات ديال داك التخربيق ديال الالعاب الالكترونية وول البارح خدات مارشي هاد العام اللي فيه 49 مليون و500 الف درهم.

وهي اللي خدات مارشي ديال جناح المغرب فالمعرض الدولي للكتاب بباريس وبلادنا ضيف شرف هاد العام. فهاد المارشي حتى شركة ما دخلات كتنافس لان كلشي عارف شكون ياخدو. وخدات مارشيات اخرى فالمعرض الدولي للكتاب وحتى تدبير شالة خدات فيه شي بركة. 

دابا كيهدرو باللي هاد الشركة كتوجد لحفل افتتاح واختتام الكان بلا خبار حتى الجهات المنظمة. 

ياخد هاد لوزير اللي من حزب التراكتور٬ مارشي كبير بحال “فان زون” اللي غاديين يكونو فعدد المدن المغربية واهمها الرباط اللي باغي يترشح ليها للانتخابات راها فضيحة ليه وللحكومة وللجهات المنظمة. شي يخدم يجيب تظاهرات كبيرة للبلاد وشي يستافد منها سياسيا.

دابا علاش ما جاش المجلس الاعلى للحسابات ولا مفتشين من المالية يديرو كونترول لجميع الصفقات اللي دارها هاد لوزير من نهار بدا يخدم. حتى المعارضة فالبرلمان فاشلة ومتواطئة. ما عمرها طالبات بهاد الشي.