كود سبور//

تفاجأ كل متتبعين الكورة فالقارة الإفريقية وبالخصوص المغاربة منهم، بالخبر اللي نشراتو جريدة “ليكيب” الفرنسية واللي فيه تصريح نسباتو للكاتب العام للاتحاد الإفريقي فيرو موسينگو أومبا، كايقول أنه تقرر تأجيل كأس إفريقيا “المغرب 2025” إلى بداية عام 2026، باش البطولة الإفريقية ما تكونش مزاحمة مع كأس العالم للأندية اللي غاتكون فالمريكان صيف 2025.

مباشرة من بعد هذا الخبر، تواصل “گود” مع المصادر ديالو، ونشر خبر النفي ديالها لكل ما نشرت الجريدة الفرنسية، من أن يكون الاتحاد الإفريقي قد أصدر قراره بتأجيل كاس إفريقيا ’’المغرب2025” إلى بداية عام 2026، وأكدت نفس المصادر أن هادشي ما كاينش، وأن إقامة الكان بداية عام 2026، هو فقط مقترح من بين عدد ديال المقترحات اللي يتم تداولها داخل الجهاز الإفريقي بتنسيق مع الجامعة الملكية المغربية لكرة القدم من جهة، ومع الاتحاد الدولي لكرة القدم من جهة ثانية، وأنه مازال لم يحسم بعد فالقرار ديال موعد إقامة المسابقة.

ومن بعدها خرج الاتحاد الإفريقي لكرة القدم، ونشر بيان رسمي، كذّب فيه جريدة “ليكيب” الفرنسية، وأكد أن كل ما نشراتو من تصريح منسوب للأمين العام للكاف بخصوص قرار تأجيل كأس إفريقيا ’’المغرب 2025” إلى بداية عام 2026 ماشي صحيح، وأنه خبر كاذب، وزادت أكدت ما نشر “گود”، بأنه يتم تداول مقترحات مواعيد إقامة المسابقة داخل اللجنة التنفيذية للكاف، ومازال ما صدر القرار، وأنه ملي غايتقرر الموعد الرسمي غاينشر الكاف بلاغ رسمي ويعلن فيه هذا الخبر.

وملي الاتحاد الإفريقي خرج وكذب كل ما نشرت جريدة “لكيب”، مباشرة من بعدها قام الجورنال الفرنسي بخطوة غريبة وكتنقص من المصداقية ديالو، وناض مسح الخبر من الموقع ديالو، وهذا الشي كيخلي الشكوك كتحوم حول الطريقة اللي نشرت بها الجريدة الفرنسية الشهيرة “خبر كاذب”، وبالمقابل تنوض المؤسسة اللي تنشر عليها الخبر وتخرج تكذب هذا الخبر ببيان رسمي، والغريب أن “ليكيب” مسحو الخبر بدون ما يقدمو اعتذار للاتحاد الإفريقي لكرة القدم وللمتابعين لمنبر عالمي بحال المنبر ديالهم، وهذا الشي كيخلي السؤال يتطرح “واش كان هذا تقلقيل؟ ومحاولة من جهة معينة تسخر منبر إعلامي كبير ومشهور عالميا باش تعبر الطونسيون وتشوف رد الفعل قبل الحسم فموعد إقامة البطولة”.