كود الرباط//

أزمة الاحتجاجات الأخيرة لي وقعات فالتعليم، واللي تقريبا أكبر احتقان وقع فتاريخ هاد القطاع فهاد 20 سنة الأخيرة، كشفات جزء آخر من ضعف الكفاءات وغياب التواصل من قبل مدراء الأكاديميات، منهم للي سنوات هوما معمرين هاد المناصب بلا محاسبة ولا تقييم.

الإصلاح لي جابت الحكومة كبير، وخصو أطر إدارية قافزة وشابة وقادرة تزيد طور راسها، ولكن بشرط خص مسامير الميدة فهاد الوزارة يطيرو منهم مدراء أكاديميات راه كولشي عارفهم داخل الوزارة.

هاد الاحتجاجات أكدت كذلك، بلي بعض مدراء الأكاديميات عجبهم هادشي لي وقع بحالهم بحال المدارس الخصوصية المستفيد الأكبر من استمرار الإضراب.

تقارير المجلس الأعلى للحسابات كانت دارت على الأكاديميات كشفات الفضايح فكولشي، من الصفقات ديال اللوجستيك تال بناء المدارس وصول بالدعم التربوي وغيرها.

على سبيل المثال لا للحصر، أكاديمية الشرق بوجدة، مديرها من 2013 وهو باقي فرأس المديرية، 10 سنين والنتائج كارثية. لا أهداف تححقات ولا برامج نجحات ولا بنايات مقادة.

هاد النموذج ديال مدير كان موظف بجماعة وجدة ثم انتقل للنيابة ثم للأكاديمية.. واش صالح يبقا مدير؟ أبدا، والوزير بنموسى عارف وسبق ليه زار الجهة الشرقية ووقف على واقع التمدرس فيها.

مصدر بوزارة التربية الوطنية أكد لـ”كود” بلي بنموسى جا بمنهجية التعاون باش ينزل الإصلاح ولكن “مؤكد بلي ريوس الميدة فشي إدارات خص يتبدلو”.