كود الرباط//

علمت “كود” من مصدر مطلع، بلي للي تقال على تدخل أحد أفراد العائلة الملكية  فقضية منع مجموعة من الفتيات والفتيان من الدخول لريسطو بار شوكو المعروف فالعاصمة الرباط، بسبب الحجاب، كولو كذوب، بل أكثر من ذلك كاينين فيديوهات كيوثقو الحقيقة.

وعكس ما روجه واحد المدون فايسبوك كيقدم راسو مؤثر حتى هو، كله كذوب، ومكاين لا منع المحجبات ولا تدخل شي حد من القصر باش يوبخ مول البار.

حسب مصادر “كود”، للي كاين هو أن مجموعة من الشباب جاو يدخلو واخا فيهم لي دار ريزيرفاسيون، منهم القاصرين والقاصرات، هنا مول البار طبق القانون ومنع دخول القاصرين.

هاد الهضرة ديال العائلة الملكية تدخلت ووبخت مول البار غير كذوب، والجميع كيعرف بلي سيدنا ديما كيطبق القانون وحريص عليه وملتزم بتطبيق الدستور، هنا مغاديش نذكرو الأدلة والأمثلة على ذلك لأنها معروفة، ولعل أبسطها أنه كيوقف فالضوء الأحمر فالطريق. نفس الشيء لولي العهد مولاي الحسن للي شفتو شخصيا وقف فحي أكدال فالضوء الاحمر وبشكل عادي حدا رباط سانتر.

يشار بلي واحد الناشط فالفايسبوك كيقدم راسو إعلامي ولا مؤثر ولا ناشط فنقل الأخبار و’’كوبي كولي‘‘، كتب فالصفحة ديالو كلام خطير عن العائلة الملكية، وقال بلي واحد من أفراد العائلة الملكية تدخل ولقن دروس لواحد مول بار معروف فالرباط “شوكو”، فاش مبغاش يخلي بنات محجبات يدخلو لهاد البار لي كيدير السهرات والشطيح والنشاط.

القضية حسب مصدر “كود” مافيها لا حجاب ولا عائلة ملكية، واللي كاين مول الريسطو قدم الشكاية بهادو لي شهرو به ونشرو عليه الفايك نيوز.

وكان المؤثر محمد واموسي كتب فالفايسبوك :”عند مدخل المطعم، جرى منع أربع صديقات ابنتي ممن يضعن الحجاب من الدخول بحجة أن ’’الحجاب ممنوع حفاظا على مشاعر زوار المطعم الأجانب ‘‘، و قد شعرن بصدمة لا توصف حين اشترط عليهن المطعم نزع حجابهن مقابل السماح لهن بالدخول وزاد: ”شكرا لأحد أفراد العائلة الملكية (لن أذكر اسمه حفاظا على الخصوصية وقد كان موجودا بالصدفة) الذي تدخل ولقن صاحب المطعم درسا في احترام الحجاب وجعله يتوسل ويعتذر للضيفات المحجبات‘‘.

حسب العاملين والمسؤولين على هاد البار، هادشي لي جاء فتدوينة واموسي كله كذوب، وبلي بداو الإجراءات ديالهم القضائية ضدو.