كود – وكالات //

قالت وكالة بلومبرغ اعتمادًا على ميثاق ديال «مجلس السلام» الجديد باللي إدارة الرئيس الأمريكي دونالد ترامب كتطلب من الدول لي بغات تاخذ عضوية دائمة فالمجلس أنها تساهم بفلوس كيوصلو حتى مليار دولار فالسنة اللولة، وكتبين المسودة أن العضوية العادية ما كتفوتش 3 سنين، وكتكون قابلة للتجديد، إلا إلى كانت الدولة خلصات هاد المبلغ الكبير، ديك ساعة كتولي العضوية مفتوحة، كما كتبيّن الوثيقة أن ترامب غادي يكون هو الرئيس الأول للمجلس، وعندو صلاحيات واسعة فاختيار الدول الأعضاء واتخاذ القرارات.

فالمقابل، خرج البيت لبيض باش ينفي هاد المعطيات، ووصف التقرير بأنه ’’فايك نيوز”، وأكد باللي ما كاين حتى حد أدنى مالي مفروض للانضمام لمجلس السلام، وقال فالبيان ديالو بلي المجلس كيعطي العضوية للدول الشريكة لي كيبينو التزام قوي بالسلام والأمن والازدهار، بلا ما يكون شي شرط مالي محدد بحال مليار دولار ، حتى وزارة الخارجية الأمريكية ما أكداتش هاد الرقم، وشارت بلي التصريحات والمنشورات السابقة ديال ترامب والمبعوث ديالو ما فيها حتى هضرة على هاد المبلغ.

هاد القضية خلّقات نقاش دوليً حيث بزاف ديال المتابعين شافو أن ربط العضوية فمجلس دولي بمساهمات مالية كيشكل سابقة ويقدر  يفتح الباب لنفوذ أكبر للدول القادرة على الدفع، وفنفس الوقت بقى هاد المقترح ممحسومش رسميًا، حيث ما تصاغتش  الصيغة النهائية للمجلس ولا الميثاق ديالو، وبقا نفي البيت الأبيض مهم باش نفهمو اشنو واقع فعلاً وشنو غير لي تسريبات إعلامية.