كود – وكالات //

فسوشل ميديا طلع وحد تراند ديال شريب القهوة قبل العلاقة الحميمية عند العيالات، من الناحية العلمية، الأدلة ضعيفة وما كاين حتى تأكيد واضح بأنها كتقوي النشوة الجنسية بهاد الشكل اللي كيتقال، حيت الكافيين اللي هو المكوّن الرئيسي فالقهوة كيخدم على الجهاز العصبي وكينقص الإحساس بالعيا وكيطلع شوية فعدد ضربات القلب، وكيخلي الإنسان فايق، هاد التأثير ممكن يكون عندو علاقة غير مباشرة بالإثارة، حيث الجهاز العصبي كيلعب دور فهاد العملية، ولكن هاد الشي ماشي دليل كافي أنه كيحسّن النشوة.

الدراسة اللي كيعتمدو عليها بزاف دالناس دارت غير على الفئران فـ2005، ولقات أن الإناث زاد عندهم سلوك التزاوج من بعد الكافيين، ولكن ما كايناش دراسات قوية على البشر كتأكد نفس النتيجة، كاين حتى بحث جديد نسبياً داروه على عيالات عندهم مشاكل فالإثارة بسبب أدوية الاكتئاب، ولقاو تحسن خفيف فالتفاعل الجسدي.

فالمقابل خبراء فالصحة الجنسية كيشوفو أن الكافيين ممكن يكون عائق إلا تزاد، حيث كيقدر يسبب القلق وتسارع القلب، وهما كينقصو من التركيز والراحة اللي ضروريين للوصول للنشوة.