كود -ايلاف //

فالسوشيال ميديا طلع تراند جديد عند بعض العيالات ديال استعمال هرمون التستوستيرون بحال شي دوا كيعطي الجهد ، و يقاد المزاج، ويقوّي الرغبة الجنسية ويعاون حتى فالعضلات، شي مؤثرات سماوه “هرمون القوة الخارقة”، وكاينات حتى اللي كيدݣوه براوات فمراودهم او  كينات  كيشربوه  كينات ولكن السؤال كيبقى واش هاد شيي علمي ولا غير موجة خطيرة؟

مجلة “ذي إيكونوميست” كتوضح باللي التستوستيرون ماشي غير هرمون ديال الرجال، راه حتى العيالات خاصهم، وكيلعب دور مهم فالرغبة الجنسية والتهياج حيث كيرفع الدوبامين وكيحسسهم بالنشوة كتر ، تاريخياً كان كيتوصف للعيالات اللي عندهم نقص فالرغبة من الربعينات ، ولكن حبس بسبب الخوف من العلاجات الهرمونية ونقص الدراسات فلالفينات.

مورا 2019 رجع التستوستيرون يتوصف ولكن غير فحالات طبية  محدودة بحال نقص الرغبة الجنسية ،الأرقام كتبيّن ارتفاع كبير فالوصفات، ولكن الأطباء كيأكدو باللي العلاج خاصو يكون بلادوز معقولة وكريمات جلدية، وماشي ببراوات قوية، حيث الكمية الزايدة كتدير أعراض خطيرة بحال حب الشباب، الشعر الزايد، تقلبات فامورال، وحتى حروشية فالصوت.

كاينة هضرة  حتى على  فـ“الضبابة ديال  الدماغ”  فسن اليأس، ولكن العلم مازال ماحسمش فهاد النقة ،  الخبراء كيقولو باللي الاستعمال بلا سبب طبي مغامرة وخطير، خصوصاً بكمية كبيرة ، الحاصول  التستوستيرون يقدر يكون مفيد للي عندهم مشكل طبي بحال الرغبة ، أما للي باغيين غير النشاط والحيوية، فراه غير موضة.