كود الرباط//

حصلت “كود” على تفاصيل إضافية عن قيام عدد من لجن التفتيش التابعة لوزارة الشغل لمقرات الأحزاب السياسية، لمعرفة وضعية المستخدمين والعاملين بهذه المقرات ومدى التزام مسؤولي الأحزاب بقوانين الشغل.

وحسب مصادر “كود” فإن الإدارة الجهوية لوزارة الشغل رسلات لجن تفتيشية ودارت محاضر لعدد من مقرات الاحزاب، ولقات فضائح.

ومن هذه الفضائح، بحسب مصدر موثوق، هو شكاية لأجير في مقر الاتحاد الاشتراكي بجهة الرباط سلا القنيطرة، توصلت بها مفتشية الشغل.

بل أكثر من ذلك :”هناك محضر المحضر لدى الإدارة الجهوية التي قامت بزيارة مقر الاتحاد الاشتراكي بناءا على شكاية الاجير “. يقول ذات المصدر.

دبا الحرب نايضا بين الاتحاد والوزير امكراز، على قضية cnss. لشكر مخلا ما قال على وزير الشغل وعطا تصريح لجريدة الاخبار عطا فيه العصير مزيان لامكراز.

طبعا امكراز لقا فرصة مناسبة ف مناقشة مشروع ميزانية وزارة الشغل، وقال بلي هاد الحزب مامسجلش مستخدمين فcnss.

بالنسبة للمتتبعين هادي فضيحة فحزب الاتحاد لي كيدعي انه مدرسة.

والغريب فالامر ان المدافعين على هاد الفضيحة هو المهدي المزواري، عضو المكتب السياسي لحزب الاتحاد لي استفد من كعكة هيئة ضبط الكهرباء، ولي هي فضيحة كولشي عارف كيفاش تخلص فيها المزواري مقابل الادوار لي دار فجماعة المحمدية. علما انه ماشي متخصص فالكهرباء.

المزواري تحد وزير الشغل يخرج المحضر ديال هاد الخرق.

امكراز أوضح خلال مناقشة مشروع ميزانية وزارة الشغل يوم الاربعاء الماضي بلجنة القطاعات الانتاجية، بلي“حزب الاتحاد مصرحش بأجرائه”، مؤكدا أنه عندو محضر يثبت كلامه.

مصادر برلمانية قالت بلي امكراز رد الصاع صاعين للكاتب الأول لحزب الاتحاد ادريس لشكر، خصوصا بعد الحملة لي قادها ضد وزير الشغل بعد فضيحة cnss.