احمد الطيب كود الرباط ////
هاد ليام كاينة شي فيديوات كيروجو فوسائل التواصل الاجتماعي فيها باللي الزماگرية ما جاوش بزاف. شي وحدات ووحدين كيهدرو بلا ارقام بلا معطيات. عاطينها غير للانشاء والفايك.
“كود” سولات الجهات الرسمية على واش هاد لكلام شاد. على حساب احصائيات رسمية حصلات عليها “كود” فشهر يونيو اللي فات دخل للمغرب 929 الف من مغاربة العالم. هاد الرقم راه كيمثل وفق مصادر “كود” الرسمية زيادة ب13 بالماية مقارنة بيونيو ديال العام اللي فات
كاين مؤشر اخر مهم، وفق هاد الاحصائيات اللي حصلات عليها “كود”، فمغاربة العالم كيمثلو 55 بالمائة من عدد المسافرين اللي دخلو لمطارات وموانئ المملكة.
المعطيات من مطارات وموانئ المغرب فليام الاولى لشهر يوليوز كيتقول باللي العدد كبير ديال الزماكرية داخلين.
كاين فرق كبير بين مغاربة العالم جاو للبلاد يزورو لبليدة والاهل ولحباب وبين شي زماكرية كيجيو مباشرة لاوطيلات فمدن المغرب. ثم هادوك اللي كيهدرو على لغلا فلوطيلات او على الزيادة فيها وكيقارنو بلادنا بالصبليون راهم كيديرو هاد الشي بلا ما يعرفو
فالصلبيون كلشي طلع. اللي كان كيكري فشي بلايص فالكوسطا ديل صول هادي 3 سنين او كثر ب100 اورو ولى يكري اليوم ف200 حتى 250 اورو. الارقام الرسمية فهاد البلد خرجات هاد ليام كتقول باللي كاين لغلا فكلشي. فالصبليوني ولى كيخسر كثر. ف2024 خرج بالعطلة 390 اورو للشخص=شي 4 الاف درهم= هاد الشي طلع ب42.7 بالمائة مقارنة مع 2021
الصبليون براسهم ما بقاوش يخرجو من ديورهم فالصيف. ما عندهمش عطلة وما كيعرفوهاش. حسب الارقام الرسمية 37.2 مليون صبليوني صيفو العام اللي فات. وف2024 كانو 2 بالمائة كثر من هاد العدد. علاش؟ لغلا فبلادهم. هادي فدولة كتعتابر العطلة الصيفية تقريبا حق.
