كود طنجة //

الصحافة الإسبانية  لقاتها فرصة باش توجه ضربات تحت الحزام للمغرب وبالتحديد لمدينة طنجة للي عندها صيت عالمي، وهي بوابة المغرب على أوروبا، ونشرت تقارير حول فضيحة سوق سيدي احساين، وتساءلت: واش الفيفا إلى شافت هاد الصور غاتخلي طنجة من بين المدن للي غادي تحتضن مباريات كأس العالم؟!.

صحف بحال elperiodicodeceuta وteleceuta، نشرت صور العار للي بينات طنجة وكأنها تعيش في فترة القرون الوسطى، اللحم كيتباع على الطوابل د اللوح، وفمحلات مزالا بالسيما والياجور، ما فيهوم لا ما لا نظافة، الدجاج كيتذبح فالأرض ويتقطع ويتباع للشعب فغياب جميع الشروط الصحية، الأرض ديال السوق كلها دمايات، كلاب الشوارع تتسابق على بقايا اللحوم وأطراف الدجاج..

حسب مصادر  ف طنجة، فا للي شاف هاد السوق يستحيل يصدق أن هاد الفضيحة كاينا فمدينة طنجة، المدينة للي صرفات عليها الدولة مئات الملايير فإطار مشاريع طنجة الكبرى باش تولي حاضرة تنافس أشهر المدن فحوض البحر الأبيض المتوسط، ويجي واحد سميتو الليموري فرضو التراكتور عمدة ديال طنجة ويرجعها مدينة مشوهة ويخلي الصبليون كيتشفاو فينا.

مصادر حزبية علقت على الموضوع بالقول :”للي ماشي مفهوم هو علاش الوالي التازي كيتفرج ومابغاش يوضع حد لهاد الشوهة للي مفروض وزارة الداخلية ترسل لجنة مركزية للتحقيق فهاد السوق/ الفضيحة”.

يشار بلي هاد السوق هو السبب باش عمدة التراكتور فقد الأغلبية ديالو، حيث بغى يدوز دفتر تحملات تدبير هاد السوق في محاولة للتغطية على شبهات ديال الخروقات الخطيرة للي فيه، لكن معظم أعضاء التحالف للي كيسير مع البام فطنجة تمكنوا باش يطيحو هاد دفتر التحملات، وطالبو بفتح تحقيق فالخروقات للي فيه، وبسباب هاد الملف الليموري ومعاه التراكتور اصبح معزول فجماعة طنجة.

هاد السوق كان من ضمن مشاريع طنجة الكبرى، وسيدنا هو للي دشنو، هاد السوق كان فيه جوج مرافق:

1: اسطبل لاستقبال الماشية الموجهة للذبح فالمجزرة الجماعية

2: سوق لبيع الماشية للعموم مستقل عن المجزرة الجماعية.

لكن فعهد الليموري جات واحد الشركة كرات هاد السوق، لكن وقعات أمور بين جماعة طنجة والباطرون ديال هاد الشركة، ومشى خلق نشاط جديد غير موجود بدفتر التحملات هو بيع اللحوم الحمراء والبيضاء، ووصلت السيبة لدرجة أن هاد الشركة بنات محلات بدون ترخيص، ما فيهاش أدنى شروط الصحة والسلامة، وعلى داك شي رفضت أمانديس تربطهوم بالما والضو، ومع ذلك الشركة كرات هاد المحلات للجزارة وسمحت ليهوم باش يديرو الطوابل يبيعو فيه اللحم وكأننا في أحد الأسواق الأسبوعية للي كانت فبلادنا هادي 50 سنة.

الليموري منين حصل بغى يفرض على المجلس يصادق على تعديل لدفتر تحملات هاد السوق باش يعطي شرعية قانونية لهاد الفوضى الي دارت الشركة.

السؤال المطروح للي مبرزط الفاعلين والمنتخبين أغلبية ومعارضة بطنجة هو: شكون كيحمي هاد الليموري وعاطيه الحصانة ضد المساءلة والمحاسبة، حيث هاد الملف بوحدو خص يتفتح فيه تحقيق جنائي وتجي ليه لجان التفتيش حيث فيه شبهة جريمة إهدار المال العام باينة، وتغيير وضعية مرفق سبق لملك البلاد دشنو. واش كاين شي تحدي شي سيبة كثار من هادي؟!.

https://web.facebook.com/watch/?mibextid=wwXIfr&v=1411346576913777&rdid=gX2FysCGHbSVwTuJ