احمد الطيب كود//

أصدر التنسيق النقابي الوطني لقطاع صحة بلاغ يستنكر فيه المنهجية التي وصفها بـ”الأحادية الهجينة والدخيلة” على وزارة الصحة، وتهريب الأنظمة الأساسية للعاملين بالوكالتين من النقاش والتوافق، والتعينات بدون مساطر.

وحذر التنسيق، حسب الوثيقة التي توصلت بها “كود”، من الاستمرار في نفس المنهجية بخصوص ما هو قادم، معلنا عن استعداده لكل الاحتمالات بسبب عدم تنفيذ اتفاق 23 يوليوز 2024 وتنزيله في النظام الأساسي النموذجي.

كما استنكر تعامل وزير الصحة، محملا إياه مسؤولية كل ما يقع، مسجلا عن عدم طرح الأنظمة الأساسية للعاملين بالوكالتين للنقاش والتوافق، وكذا التعينات بدون مساطر.

ودعت الوزير إلى تحمل مسؤولياته كاملة بالتنزيل السريع والكامل للاتفاق وبشكل مستعجل وتصحيح المنهجية التي يتبعها قبل فوات الأوان.

فهاد الفيلم، كاينا شكوك كثيرة حول شكون كيحرك النقابات ف الصحة، بحيث قبل ايام توصلت “گود” بمعطيات تفيد بلي مسؤولين نافذين فالوزارة دايرين حملة كبيرة ضد الوزير الجديد امين التهراوي.
هاد الحملة دافع به مسؤول نافذ فالواجهة، كولشي عارف بلي غادي يطير ما هي إلا ايام معدودة، لكن داير دور خبيث، عندو شبكة علاقات مع النقابات في اطار “عطيني نعطيك.

هاد المسؤول محسوب سابقا على حزب مشارك دبا فالحكومة ، باقي كيدير الفتنة فالوزارة وخدام باجندة غريبة كتعرقل الوزير، حيث كيعتبر راسو هو الوزير الحقيقي.

شكون كيدفع الثمن حاليا؟.. الإصلاح . اي حاجة فيها الإصلاح خصها تبلوكا، اي حاجة كتمشي ضد مسامير الميدة خصها تبلوكا. الدليل حسب وفق مصادر “گود” هو ان بعض المسؤولين مشاو عند احزاب ونقابات كيحرضو ضد التهراوي.
الوزير التهراوي مكيعقلش على حد، معندوش مع الوجهيات الحزبية والسياسية، تقنقراط باغي بلادو ويصلح إعطاب الصحة. لكن بعض المستفيدين من النقابيين والإداريين والمديرين ماخلاوهش حتى يقول بسم الله فمسارو.

بيان كله مزايدات من النقابات، الوزير مزال مدارش الإعفاءات لي خصها دار ، ومعروف شكون خصو يطير وخصو يبقا، لذلك وفق منهجية الوزير : عهد الترضيات سالا وعهد الفساد الكبير سالا.
هاد المسؤولين ف النقابات فالوزارة راه ديما هكا، مع اي وزير كيفما كان، كيبغيو يخضعوه .

النقابات هادي غير ايام وقعات اتفاق مع وزير الصحة، بكل التفاصيل الدقيقة، نقطة نقطة.
خاص دبا الوزير يخرج المنظام الجديد ويدير زلزال تاريخي فالوزارة.
“گود” غادي ترجع للتفاصيل كاملةوغادي تعطيكم اسماء المتورطين فهاد الفضيحة وسط الصحة.