كود سبور//

كايحاول الفرنسي هيرفي رونار يستغل الفرصة باش يرجع لتدريب المنتخب الوطني المغربي مرة أخرى، بعدما كانت عندو تجربة معه فمرحلة سابقة.

هيرفي رونار خرج فتصريح له كايقول بأنه ما كانش عليه يمشي من المنتخب الوطني المغربي نهائيا، وقال بلي كان عندو عقد مع الجامعة الملكية المغربية لكرة القدم حتى لعام 2022، ولكن مشى بحالو عام 2019.

وكايبان أن هيرفي رونار كايحلم باش يرجع للمنتخب الوطني المغربي ونادم نهار مشى بحالو، وقال: “ما كانش علي نمشي بحالي ولكن هذه أخطاء كانديروها فالكاريير بروفيسيونيل، وملي كانرجعو نفكرو فيها كانعرف بلي غلطنا”.

وكاتجي هذه الخرجة ديال هيرفي رونار مع هذا الجو الضبابي والقيل والقال على مستقبل الناخب الوطني وليد الركراكي مع المنتخب الوطني المغربي، بعد خسارة نهائي كاس أفريقيا وقبل حوالي 4 اشهر من مونديال 2026، مع العلم رونار راه شاد المنتخب السعودي حاليا.