كود سبور//
مازال زايد هشام ايت منا رئيس الجمعية الرياضية للوداد الرياضي فالتسيير ديالو العشوائي والانفرادي فالنادي، وفخرق القانون والتطاول على اختصاصات ماشي ديالو.
وكيف ديما وبحال العقود اللي وقع هشام ايت منا مع اللاعبين والشركة ديال التونيات الجديدة ووسيطها التونسي،  واخا ماشي هو الرئيس القانوني للشركة الرياضية للوداد الرياضي واللي رئيسها القانوني هو سعيد الناصيري، مازال ايت منا كايوقع على وثائق واخا ما عندوش الصفة القانونية فالشركة الرياضية، وهذه المرة وقع تاني واحد رسالة شكر للاعب السابق للوداد حسن السمغوني المقيم فالميريكان واللي كان واقف تماك خلال تواجد الفريق بالولايات المتحدة الأمريكية باش يعاون الفريق ديالو فالصغيرة والكبيرة.
مزيان تكون ثقافة الاعتراف عن نادي بحال الوداد الرياضي وعند الوداديين، وخصوصا مع حسن السمغوني حيث الرجل كان واقف تماك فالميريكان وقدم بزاف ديال العوين للفريق الاحمر، ولكن خاص القانون يتحترم والشكر يكون على حقو وطريقو ماشي ايت منا يتحايل على القانون باش يشكر الناس او يوقع وثائق ديال الشركة الرياضية تحت مسمى رئيس اللجنة الإدارية، والسؤال هنا واش هذا الشي اللي كايدير فيه ايت منا واش انتحال صفة ؟ حيث الرئيس ديال الشركة الرياضية مازال هو سعيد الناصيري.