كود – كازا ///
بزاف ديال المتتبعين للشأن الكروي وخبار الميركاتو ديال الفراقي ف كازا ماعارفينش أن الوداد والرجا فتحو الباب قدام لاعبين أجانب من جنسيات دول عربية تابعاهم فضايح ديال التحرش الجنسي وعقوبات حبسية وإدارية من الفراقي اللي كانو كيلعبو فيها..
الرجا سينات مع لاعب مصري كانت عندو الصفة الدولية قبل ما يفقدها بسباب الضسارة ديالو. هاد اللاعب هو عمرو وردة صاحب التاريخ الحافل بالتحرش الجنسي واللي جا للخضرا ف صفقة انتقال حر قادما من أبولون ليماسول القبرصي.
اللاعب المصري عمرو وردة لا يتمتع بسمعة أخلاقية كبيرة في عالم الكوورة، بسباب الاتهامات اللي كتلاحقو بالتحرش الجنسي بالفتيات في مصر وخارجها من 2013، رغم نفيه المتكرر، ابتداءا من اتهامات بالتهجم على فتاة فرنسية بفندق بتونس، ثم التحرش بعارضة أزياء سنة 2019 في مصر خلال تواجده مع منتخب بلاده.
وعلى حساب تقارير إخبارية، ف خلال احترافه في اليونان كشفت صحف محلية تحرشه بصحافية، هذه الأخيرة كشفت عن ملاحقتها من قبل اللاعب وعرضه قضاء يوم كامل برفقته. فريقه اليوناني “باوك سالونيك” وأمام تزايد شكايات تحرش موجهة ضد اللاعب قرر التخلي عنه وإعارته لنادي فيرينسي البرتغالي.
عمرو وردة ما تنساش بزاف ف البرتغال، حيث كشفت الصحافة عن اتهامات ليه بالتحرش بزوجات اللاعبين اللي معاه ف النادي، ليعاد إلى النادي اليوناني اللي تخلى عليه لاحقا بشكل نهائي وخاذ وراقو وبقا ليبر حتا سينات معاه الرجا..
من جهته، وقع نادي الوداد الرياضي مع ظهير أيسر جزائري ف صفقة انتقال حر، ويتعلق الأمر بالدولي الجزائري إلياس شتي، اللي صدر ف حقو حكم بالسجن لأربعة أشهر سورسي، بعدما أقر أمام البوليس بأنه لمس فتاة دون رغبتها في مقهى ليلي، خلال فترة التوقف في مونديال قطر.