گود سبور//

كشفت منصة TCR المهتمة بأخبار الأسطورة البرتغالية كريستيانو رونالدو، أنه كاينين فرق مهتمة به وتبغي تسني معه باش يلعب معها، إلى تفارق مع النصر السعودي، حيث واقعة أزمة ما بينو وبين المسؤولين د الكورة السعودية، وكايشوف أن الفريق ديالو ما واخدش حقو فالدعم من صندوق الاستثمارات السعودية بالمقارنة مع الهلال.

وحسب موقع Whoscord المتخصص فصفقات اللاعبين والمدربين عبر العالم، فالوداد الرياضي هو النادي الأكثر مفاجأة بين الأندية المرتبط اسمها بكريستيانو رونالدو، ولكن قدر يكسب اهتمام كوجهة محتملة للنجم البرتغالي، والفريق متصدر فالبطولة المغربية وعندو فرصة قوية للمشاركة فدوري أبطال إفريقيا، وهاذ الشي غايعط لكريستيانو فرصة باش يخلي بصمة فالكورة الأفريقية، مع العلم أن مع نهاية الموسم الماضي كانت قالت ماركا إن الوداد دخلو فمفاوضات مع كريستيانو رونالدو، ولكن ما كان والو من وراها.

موقع Whoscord قال بلي انتقال كريستيانو رونالدو للوداد إلى وقع، غادي ينفعو بزاف رياضيا وحتى خارج التيران، حيث الوداد غايعطوه قيادة الفريق، وهاذ الشي غادي يهز حتى بلاصة النادي عالميا، ويعطيه اضافة باش يزيد ينافس على الألقاب القارية.

وبالإضافة إلى الوداد الرياضي، كشف نفس المصدر أن ريال مدريد حتى هما مرشحين للتوقيع مع كريستيانو رونالدو مرة أخرى، بعدما سبق له ولعب معهم وحقق معهم ألقاب كثيرة وكان هو النجم الأول فالفريق، وكاين لوس انلوس كلاكسي الميريكاني.