أحمد الطيب – كود///

وزير الداخلية، عبد الوفي لفتيت، كان عطا رسالة واضحة مافيهاش التأويل أو شي حاجة من هاد القبيل. لفتيت كان وجه كلام شديد اللهجة من داخل قبة البرلمان، وصرح أن كل من استحوذ على شي أرض تابعة لجماعة ترابية أو دار يدو فالمال العام غادي يجيبها غير فراسو.

وزير الداخلية دعا إلى الإسراع بإرجاع الأراضي والأموال المنهوبة بالزربة، وقال بالحرف: “اللي دا شي طرف من أرض مشروع كانت مخصصة لشي حاجة، راه ما غاديش نتفارقو معاه، وغادي نرجعو الماضي كامل”.

“كود” كانت نشرات في مقال سابق باللي الوكيل العام ففاس فتح بحث قضائي مع النائب البرلماني عزيز اللبار المنعش السياحي والعقاري المعروف، وهاد البحث تكلفات بيه الفرقة الجهوية للشرطة القضائية اللي سمعات ليه في محضر قانوني، في انتظار الانتهاء من الأبحاث فهاد القضية اللي عندها بشي خروقات فمجال التعمير.

مصادر أكدت لـ”كود” أن البحث القضائي المتواصل فهاد القضية مع اللبار جاء بناء على شي شكاية توصلات بها النيابة العامة وتحركات، واللي كان مورها المقاول اللي كان مكلف ببناء عدد من التجزئات السكنية لعزيز اللبار لكن وقعو مشاكل بينتاهم، ووصلات حتى للقضاء التجاري، وتدخلوا عدد من المقربين من اللبار باش يفكو المشكل، وتسالا هادشي بالصلح واتفاق بين الأطراف.

وفضلا عن المشكل التجاري اللي كان عندو مع اللبار، فإن هاد المقاول كان حط شكاية حتى ف النيابة العامة، ودبا تم فتح بحث قضائي فيها، وتم الوقوف على شبهة الترامي على شي أراضي.

كاين هضرة، وفق ما أكدته مصادر “كود” على شي أرض كانت تابعة لمجموعة سكنية معروفة، وتم تسليمها للجماعة، قبل مينوض اللبار يدخلها مع فندق ديالو، وكاينة ف الطريق الوطنية الرابطة بين فاس ومكناس، وهاد الأرض كانت مشات للجماعة باش ترجع طريق. لكن واش الجماعة الحضرية دارت لهاد الأرض الضم او اللا. هاد الأرض خاصها تكون طريق لكن هو دارها موقف للسيارات..

زيد عليها، حسب مصادر “كود”، كاين شي أرض فولاد الطيب فيها (قريبة من مقبرة) تحوم حولها شكوك بزاف، بالإضافة إلى شبهات تلاعبات خطيرة قد تكون ارتكبت. لكن دبا كاين بحث قضائي ومتبعو الوكيل العام بنفسو.

مقرب من اللبار كان أكد باللي حل مشكلو مع السيد لي داعيه. لكن دبا تبيّن كاين أمور أخرى ماشي المشكل المالي لي كان عندو مع هاد المقاول مع عندو شركة عقارية مع ولدو، والبحث غادي يمشي بعيد. تؤكد مصادر “كود”.

واش كلام وزير الداخلية في قبة البرلمان بدا يقرب من عدد من السياسيين؟ او بصح قرب من اللبار؟ نساينو البحث لي غادي يقول شنو كاين. وخا كنا بغينا اللبار يخرج يهضر على البحث لكن رفض يهضر وساكت. ربما الصطاف لي معاه هو لي كيقوليه سكت وربما باغي يزيد يورطو. نساينو نشوفو التطورات التالية.