الرئيسية > آش واقع > واش المغرب غادي يفتح حدودو لاربعا الجاية. الاتحاد الاوربي: المغرب من 14 دولة مسموح لناسو يدخلو من فاتح يوليوز
27/06/2020 08:30 آش واقع

واش المغرب غادي يفتح حدودو لاربعا الجاية. الاتحاد الاوربي: المغرب من 14 دولة مسموح لناسو يدخلو من فاتح يوليوز

واش المغرب غادي يفتح حدودو لاربعا الجاية. الاتحاد الاوربي: المغرب من 14 دولة مسموح لناسو يدخلو من فاتح يوليوز

كود هناء ابو علي ///

لمغاربة غادي يمكن ليهم يدخلو للاتحاد الاوربي من فاتح يوليوز. فبعد نقاشات طويلة دار الاتحاد الاوربي البارح فبروكسيل شكون اللي يمكن يكون مسموح ليه يدخل لبلدان فضاء شينگن من الاربعا الجاية . هاد اللائحة اللي فيها المغرب كضم 13 دولة اخرى وتستثنى منها الرواسة والميريكان والاتراك.

اللائحة حسب ما نشرته “لوموند” الفرنسية فيها استراليا وكندا وكوريا الجنوبية واليابان ونيوزلندا ورواندا والتايلاند والاوروگواي والمغرب والجزائر وتونس وجورجيا ومونتي نيكرو وصيربيا.

هاد اللائحة خاصها تقاد من هنا للعشية باش يتم التصويت عليها نهائيا قبل ما يتم التصويت عليها بالاغلبية الاثنين الجاي. دابا كاينين شي دول اعضاء بغات تدرس بعمق هاد اللائحة وممكن مراجعتها. يزيدو دول او ينقصو شي دول.

اللي تقرر لحد الان ان دول بحال العربية السعودية وتركيا وامريكا وروسيا واسرائيل كلهم مقصيين بسباب الوضعية ديال كورونا فيروس فبلادهم.

فقضية الصين فيلم اخر٬ تقول “لوموند”٬ ممسوح ليهم يدخلو لاوربا على شرط ان بلادهم تطبق مبدأ فالسياسة الدولية وهو المعاملة بالمثل. اي الصين تسمح للمواطنين الاوربيين ديال الاتحاد يدخلو للصين.

هاد الشي كيخلي للدول الاعضاء فالاتحاد الاوربي امكانية رفض شي دولة من هاد الدول. مثلا تقدر تقرر دولة بحال بولونيا من جانب واحد باش ما يدخل ليها حتى شي مغاربي او اي دولة اللي فهاديك اللائحة ديال 14 دولة.

دابا بقات فالمغرب. واش غادي يفتح نهار لاربعا الجاية حدودو ولا اللا. ما كاين حتى شي قرار لحد الان. لخبار الوحيدة اللي كدور دارها سفير بريطانيا فالرباط وقال باللي محتمل تحل نهار 10 يوليوز.

ممكن جدا تبدا الحدود البحرية فمرحلة اولى وتبعها الطيارات.

موضوعات أخرى