الرئيسية > كود سبور > واش المغرب غادي يربح معركة إحاترين.. الجامعة حضرات للعزا ودارتلو گنازة فالمستوى.. وهولندا ما تعرفش لهاد شي وما عندهاش مع ثقافتنا
11/10/2019 08:00 كود سبور

واش المغرب غادي يربح معركة إحاترين.. الجامعة حضرات للعزا ودارتلو گنازة فالمستوى.. وهولندا ما تعرفش لهاد شي وما عندهاش مع ثقافتنا

واش المغرب غادي يربح معركة إحاترين.. الجامعة حضرات للعزا ودارتلو گنازة فالمستوى.. وهولندا ما تعرفش لهاد شي وما عندهاش مع ثقافتنا

مصطفى الشاذلي – كود سبور//

معركة محمد إحاترين قريب تحسم لصالح الجامعة الملكية المغربية لكرة القدم، بعدما ربحات نقاط كثيرة على الاتحاد الهولندي في ليامات الأخيرة.

الموت ديال والد إحاترين قلب الموازين، وخلا الجامعة تكون اقرب لخطف الموهبة الصاعدة.
الموقف الإنساني النبيل، لي صدر من الجامعة جعل كفة المغرب تميل أكثر في الصراع عن على إحاترين.

الجامعة أزرات اللاعب والعائلة ديالو بعد وفاة والده، وقدمات ليه الدعم المعنوي والنفسي، وأكثر من ذلك صيفطات نور الدين النيبت وعزيز بودربالة وطارق نجم لهولندا باش يقدموا واجب العزاء ويكونوا في جنب اللاعب إحاترين بعد هذا المصاب الجلل.

وأكثر من ذلك تكلفات الجامعة بنقل جثمان والد إحاترين  إلى الحسمية، ودارتلو گنازة فاعلة تاركة حضرتها السلطة المحلية في شخص عامل الإقليم والمنتخبين ورئيس الجامعة فوزي لقجع.

گنازة بينات بلي المغاربة صوليدير في مثل هذه المواقف الإنسانية والاجتماعية ومتلاحمين بعضياتهم،  بعيدا عن الكرة وما يجي منها، المهم كان عند الجامعة هي تبين للاعبين المغاربة، لي عندهم جنسيات مزدوجة وعايشين في أوروبا، أن المغرب ما كينساش ولادو سواء فالمغرب أو خارجه.

هادشي ما كتعرفش ليه هولندا، لي مهتمة فقط كيفاش تقنع اللاعب إحاتربن باش يلعب للمنتخب الهولندي، ومعندهاش مع الثقافة ديالنا بحال لعزا ولگنازة والصواب، لي كنحافظوا عليه بزاف.

هولندا ما عندهاش مع هادشي كامل وما تعرفش ليه. ما يهمها هو أن إحاترين ما يلعبش للمنتخب المغربي، ما بغاتش يضيعوا منها لعابة أخرين مزيانين بحال حكيم زياش وأسامة الإدريسي وزكرياء لبيض والأخوان نور الدين وسفيان أمرابط وكريم الأحمدي. هادشي لي شاغل هولندا. لكن صعيب تقنع واحد مازال فيديل لثقافتنا المغربية وعلاقتنا الاجتماعية لي منعدمة فهولندا. هادشي علاش المعركة قربات تحسم للمغرب وإحاترين غادي يلعب للمنتخب المغربي عاجلا.

موضوعات أخرى