كود – الرباط//

الهيئة العليا للاتصال السمعي البصري (الهاكا) خرجات بقرار رسمي كيصفع المعارضة للي دارت شكايات على وصلة إشهارية دازت ف قنوات عمومية. فالرد على الشكايات لي توصلات بيها من طرف حزب العدالة والتنمية وحزب التقدم والاشتراكية والحركة الشعبية، قررات الهاكا تحفظ الشكاية، وأكدات أن الوصلة ما فيها لا تلميع لحكومة ولا ترويج لحزب.

الوصلة الإشهارية اللي بثاتها القنوات العمومية كانت كتروج لتنظيم المغرب لكأس العالم 2030 إلى جانب إسبانيا والبرتغال. هاد الحدث اللي كيعتبروه كثير من المغاربة إنجاز وطني كبير، قلباتو بعض الأطراف الحزبية لمساحة للصراع السياسي.

الشكايات كانت كاتقول أن الوصلة كتحمل رسائل سياسية وتلميع للأداء الحكومي مع اقتراب الانتخابات، لكن “الهاكا” ضربات هاد الاتهامات بعرض الحائط، وقالت أن المادة الإعلامية ما كتخالف لا مبدأ التعددية ولا الحياد الإعلامي، وأن الهدف منها هو التشجيع على التعبئة الوطنية حول حدث دولي كبير.

وزادت الهيئة بلّي القانون كيسمح بتسويق المبادرات الوطنية من طرف الفاعلين المؤسساتيين، وأن الوصلة ما فيهاش شي جهة حكومية أو مسؤول سياسي بالاسم أو بالصورة، وما كتقدم حتى خطاب سياسي مباشر أو غير مباشر.

الهاكا، بهاد القرار، وجهات ضربة جديدة للمعارضة اللي كتعيش ف أسوأ مراحلها، خصوصا بعدما فشلت للمرة الثانية في ظرف عام في تقديم ملتمس الرقابة.