كود سبور//

لمحت دالما مارادونا بنت الأسطورة الأرجنتينية دييگو أرماندو مارادونا، إلى أن المافيا عندها علاقة بالموت ديال باها، وطالبت بالكشف على حقيقة الوفاة ديالو اللي كانت عام 2020.

وهضرت دالما فبرنامج “بودكاست” فالأرجنتين، وقالت: “ماما خايفة، وحنا خايفين من المافيا، من هادوك اللي عندهم الفلوس والسلطة وكايتحكمو فكلشي”.

وكملت بنت مارادونا: “ماما كاتقوليا ديما نبقى ساكتة، وكاتقوليا ما تهضريش راني خايفة، ولكن أنا ما نقدرش حيث الخير ديال با فرقبتي”.

وزادت بنت الأسطورة، وقالت: “أنا ما مسوقاش لهم، وراني عارفة شكون كانواجه وما نقدرش نبقى ساكتة، وخاص الناس يعرفو الحقيقة”.

وكان موت مارادونا يوم 25 نوفمبر 2020، وهو حدث خلف حزن كبير فالعالم، وحسب التقارير الطبية فالوفاة جات بسبب أزمة قلبية.

ولكن عائلة مارادونا اتهمت الطاقم الطبي المشرف على العلاج ديالو بالإهمال واعتبرت أنهم كانو مقصرين وساهم هذا الشي فالموت ديالو.

أما التحقيق للي فتحاتو  السلطات عام 2021، كشف أن الفريق الطبي لمارادونا تعامل معه بطريقة خايبة وما فيهاش كفاءة وكانت متهورة وان مارادونا كانت عندو فرصة مزيانة باش يبقى عايش كن كانت عندو رعاية طبية مزيانة.

ومازال الطاقم الطبي ديال مارادونا كايتسنى المصير ديالو قدام القضاء، وهو مكون من 8 الأشخاص، متهمين بالتسبب فوفاة مارادونا ويقدر يتحكم عليهم بـ25 عام ديال الحبس، والمحاكمة ديالهم غاتبدا يوم 11 مارس 2025.