كود سبور//

انتقد نبيل باها مدرب المنتخب الوطني المغربي لأقل من 17 عام، تغيير الاتحاد الإفريقي لتوقيت ماتش فينال كأس إفريقيا لأقل من 17 عام بين المغرب ومالي، من الساعة 8 الليل إلى الساعة 3 دالعشية، وأكد أن هذا الشي ما خاصوش يكون وبلي واخا هذا التغيير فالوقت راهم واجدين باش يربحو الكأس ويخليوه فالمغرب.

وهضر نبيل باها خلال الندوة الصحافية اللي كاتسبق ماتش الفينال بين المغرب وماللي، واللي غايتلعب السبت الجاي مع 3 د العشية، وقال: “حنا واجدين باش نلعبو هذا الماتش فهذه الساعة وفجميع الحالات راه اللاعبين ديالنا كايلعبو مع الأندية ديالهم فهاد الساعة مع 3 و4 العصر، ما كايعلبوش بالليل يعني راهم مولفين يلعبو فهذا الوقت، وواجدين فأي سيناريو وضروري خاصنا نكونو واجدين فهاد الوقت اللي غانلعبو فيه وما نبداوش نقلبو على الأعذار، وأنا ملي هضرت على الساعة ماشي قصدت الجو، راني كانهضر على الجمهور حتى هو، حيث كايعجبو كثر يتفرج فالماتشات بالليل وهاديك الأجواء ديالو، ودابا الجمهور غاتكون عليه الحرارة غاتضرب فيه الشمش فالمدرجات”.

وكمل باها: “حنا ما عندناش مشكل راه حنا واجدين ووجدنا الدراري بنهار باش يولفو إلى ما كانش شي ماتش غايتلعب مع 8 الليل، والكورة هي هادي واللي بغا يربح خاصو يولف على الجو وكل الظروف وحنا وجدنا لگاع السيناريوهات وما عندناش مشكل مع الوقت، ولكن خاصنا نقولو بلي ما متافقينش على تغيير توقيت الماتش باش فالمستقبل ما يبقاوش يديرو ساعة ومن بعد يبدلوها هاكاك وفينالات البطولات كايتلعبو بالليل ماشي بنهار، كيفاش ماتش تحديد المركز الثالث غايتلعب مع 8 الليل وماتش الفينال ملعبو مع 3 العصر، وبدلتي هذا الشي فاللحظات الأخيرة حيث عطيتي واحد الأجندة فيها الفينال مع 8 الليل فگاع البطولة وجيتي حتى الأخير وبدلتي كلشي، حنا ما عندناش مشكل فهذا الشي وإنشاء الله الكأس غايبقى هنا (فالمغرب)”.