عن أ بي سي ///

الصبليون حاسمين فشكون ورا لحريك الجماعي لسبتة يومي 30و 31 يوليوز اللي فات. فاستطلاع للرأي نشراتو يومية “أ بي سي” ودارتو “گاد 3” وتنشر هاد الويكاند، قال 79 بالمائة من المستجوبين باللي المغرب ورا هاداك لحريك الجماعي لسبتة وباللي الهدف منو “الضغط على الصبليون”.

يالله 7 بالمائة اللي قالو اللا ماشي المغرب و14 فالمائة اللي ما كانش عندهم رأي. وحسب معطيات نشرتها اليومية الصبليونية ف77 بالمائة من اللي صوتو فاخر انتخابات على الحزب الاشتراكي الحاكم كيقولو باللي المغرب ورا هاد العملية

فهاد الاستطلاع تمت محاكمة حكومة سانشيث سياسيا. ف72 بالمائة من المستجوبين قالو باللي هاد الحكومة ما تفاعلاتش بالسرعة وبالوسائل الضرورية مع هاد لحريك الجماعي

طبعا مع الخطاب اليميني المهيمن جا الاستطلاع عاكس ليه ف73 بالمائة قالو باللي الحكومة خاصها تسمح للملك فيليبي السادس يزور سبتة

رقم اخر على دور الاعلام والسياسيين الصبليون فتوجيه اراء الناس هو ان 70 بالمائة عندهم تقييم سلبي لحكومة المغرب

التطرف بكل اشكالو مارس تشويه متعمد لاكثر من شهر للمغرب. كاع الصبليون من سياسييهم واعلامييهم ومثقفيهم ويمينهم ويسارهم ومتطرفهم وراديكاليهم سبو المغرب ولمغاربة وهاجموه وكيهاجموه بشكل يومي على مدينة مغربية مستعمرة اللي هي سبتة ومعاها حتى مليلية

كيعطيو الدروس يوميا وعندهم مدينة فافريقيا وكلشي كيدافع عليها