كود الرباط//

علمت “گود” أن السلطات المحلية بجماعة الهرهورة دارت حملة مؤخرا، ضد مقاهي الشيشة وبعض المطاعم اللي كتقدم هاد المنتوج.

مصدر فالسلطة أكد لـ”گود” بلي لجنة مختلطة تتكون من رجال وأعوان السلطة المحلية وعناصر الدرك الملكي والقوات العمومية ومسؤولي الصحة العمومية دارت مراقبة مطعم وحانة “فينيكيس دور” اللي لقاوه كيعطي الشيشة.

السلطات قامت بحجز عدد من القراعي ديال الشيشة وبلغت مالين المحل يحيدو الشيشة.

مسؤول فريسطو “فينيكيس دور” قال لـ”گود” بلي فعلا جات اللجنة نافيا يكونو قاموا بالتضييق عليها أو ادعاء القرب من جهة نافذة، موضحا بالقول حيدو لينا 6 قراعي الشيشة.

وأكد المسؤول فالمحل بلي كيديرو الشيشة بناء على رغبة الزبناء ولكن دبا تحيدات بشكل نهائي ونفذنا قرار السلطة، مشيرا بأن عدد من المطاعم والمقاهي لا تتوفر على الرخص القانونية بالهرهورة عكس المحل ديالهم.

ونفى المسؤول لي هو مسير البار فينيكس دور، ما تم ترويجه بخصوص إغلاق المطعم واعتقال مالكه، موضحا: “المحل خدام ومول الشي فإسبانيا”.

يشار بلي هاد البار معروف بالأغاني الشعبية والجرة وصحاب الكمنجة.