كود- وكالات//

واحد الدراسة علمية جديدة نشرتها مجلة Science شككات فالفكرة ط ديال أن اللحم بوحدو كان السبب الرئيسي باش يكبار دماغ الإنسان القديم.

الباحثين كيقولو دابا بلي السكر الطبيعي، لي كان كيجي من ديسير والعسل، لعب حتى هو دور كبير فهاد التطور، حيث الدماغ كيحتاج كميات كبيرة ديال الجلوكوز باش يخدم وينمو.

حسب الدراسة، الدماغ ديال الإنسان كيمثل غير حوالي 2 فالمية من وزن الجسم، ولكن كيستهلك  20 فالمية من الطاقة اليومية،  وهاد الشي خلا العلماء يسولو كيفاش أسلاف البشر كانو كيوفرو هاد الطاقة قبل ما يعرفو العافية والطياب، الجواب لي وصلو ليه هو أن ديسير والعسل كانو من أهم المصادر الطبيعية للجلوكوز، الشي لي خلا لأشباه البشر ياخدو نص احتياجاتهم من الطاقة فملايين السنين.

الباحثة جيني براند-ميلر، من جامعة سيدني، وضحات أن احتياجات الجسم من الجلوكوز ما كيتوقفش عند الدماغ، ولكن حتى العيالات الحوامل والمرضعات كيحتاجو كميات كبر باش يتطور الجنين بشكل طبيعي،الدراسة اعتمدات على تحليل الأحافير، وشكل الأسنان، والمعطيات الجينية، وقارنت النظام الغذائي ديال الإنسان القديم مع الشمبانزي والإنسان الحديث، ولقات أدلة كتدعم فرضية أن السكريات الطبيعية كانت عنصر أساسي فالنظام الغذائي ديال جدودنا.