ايوب جبير – كودكازا ///

فالأيام اللي دازت، خرجات واحد الهضرة بلي السردين ولا كيتباع ب 5 دراهم فبعض المدن، وشي وحدين ربطوها بكازا وقالو بلي حتى فمارشي السمك الثمن طاح لهاد المستوى. ولكن ملي خرجنا ودورنا فالسوق، لقينا الواقع حاجة أخرى.

الناس ديال مارشي كازا خرجو بتصريحات قوية، وقالو بلي هاد الهضرة كذوب، وحسب كلام واحد منهم: “يجيبو لينا السردين ب 5 دراهم، نعطيوه فيه حتى 15 درهم!” بمعنى هاد الثمن اللي تروج ماشي منطقي، حيث الصندوق ديال الحوت كيدخل عليهم بثمن كيتراوح بين 300 و 400 درهم، يعني مايمكنش يبيعوه بهاد الثمن الرخيص.

واحد مول الحوت أكد بلي “اللي قال هاد الهضرة معروف كيدير الحلقة فمراكش، وكيدير البوز بهاد التصريحات باش يجيب الفلوس اللي خسرها فالحوت.” بمعنى أن الغرض من هاد الأخبار هو خلق البلبلة لا أقل ولا أكثر.

وزيادة على هاد الشي، الناس ديال كازا كيأكدو بلي “حنا عندنا البحر وحوتنا طري، ومايمكنش يطيح بهاد الشكل، بالعكس مراكش اللي ماعندهاش البحر هو اللي ممكن يكون الحوت فيها أرخص، ولكن ماشي بهاد الثمن.”

ملي جبنا دورة فالسوق، تأكدنا بلي ثمن الحوت باقي كيفما كان، بلاشي تغيير، والسردين مزال كيتباع بالثمن المعروف اللي كيتراوح ما بين15 و20 درهم للكيلو حسب الجودة.

إذن، هاد الهضرة اللي كتروج على السردين فـ 5 دراهم فكازا ما عندها حتى شي أساس من الصحة، والواقع حاجة أخرى تمامًا.