كود باريس ///

باينة باللي المهدي الريفي٬ مدير عام وكالة التنمية الفلاحية سالات ساعتو. دار بالقاعدة اللا ينعل اللي يخلي بلاصتو مزيانة. اليوم الاحد 23 فبراير 2025 ب”ڤي اي پي” التابعة للجناح المغربي بالمعرض الدولي للفلاحة بباريس٬ تصرف تصرفات غير مسؤولة.

حسب مصادر “كود” بدات هاد الصباح بالغوات مع ليكيب ديال وزير الفلاحة والصيد البحري احمد بواري. المصيبة هاد الشي وقع قدام كلشي. تصرف بوضاعة مع هشام رحالي مدير ديوان الوزير وفنفس الوقت مدير الشؤون الإدارية والقانونية بالوزارة.

فنفس النهار وفحدود الوحدة التوقيت المحلي٬ ناضت شي وحدة اسمها محجوبة شكايل مديرة تنمية وتسويق المنتجات المجالية بنفس الوكالة اي وكالة التنمية الفلاحية اللي عمر فيها هاد الريفي هادي سنوات٬ حتى هي كتغوت وترفع فصوتها وقدام كلشي فنفس لبلاصة.

الريفي تعين ف9 نونبر 2017. قرب ل9 سنين. دابا ولى عبء على هاد المديرية المهمة. كيعتابر راسو هو الفرقة ديالو باللي فوق وزارة الفلاحة. فوق كلشي.