كود سبور//

خرج واحد الحساب فتطبيق “X” باسم الناخب الوطني وليد الركراكي، كايرد على المنتقدين له بعدما شداتو كاميرا التلفزة بين الشوطين فماتش المنتخب المغربي الأولمبي واسبانيا فأولمبياد باريس 2024، وهو كايهضر مع اللاعبين واخا هو مدرب المنتخب المغربي الأول، وماشي مدرب المنتخب الأولمبي، وهدد هذا الحساب اللي بالاسم ديال وليد الركراكي المنتقدين له اللي روجو الصورة ديالو مع لاعبين المنتخب الاولمبي فكولوار التيران باتخاذ إجراءات صارمة فحقهم.

ودار موقع “گود” بحث فالموضوع، وحسب مصادر داخل الجامعة الملكية المغربية لكرة القدم، فهاد الحساب ديال تطبيق “X” اللي كايحمل اسم وليد الركراكي، ماشي حساب حقيقي ديالو، وأكدت نفس المصادر أن الناخب الوطني ما عندو حتى شي علاقة بهذا الحساب، وما كتب والو على مواقع التواصل الاجتماعي بخصوص الصورة اللي بان فيها مع لاعبي المنتخب المغربي الاولمبي بين الشوطين فماتش دومي فينال أولمبياد باريس.

وكانت صورة لقطة شدتها كاميرا ماتش دومي فينال المغرب وإسبانيا بين الشوطين، لوليد الركراكي مع لاعبين المنتخب المغربي خلقت جدل كبير وسط الجماهير المغربية، وكلشي مازال كايسول على شنو سببب التواجد ديالو فهذاك المكان فهذاك الوقت حيث هو مدرب المنتخب الاول ومدرب المنتخب الاولمبي اللي لاعب هذاك الماتش هو طارق السكتيوي، وأسئلة كثيرة تطرحت على مواقع التواصل الاجتماعي وكلشي كيسول واش كايتدخل له فخدمتو.