كود سبور//

مع اقتراب كاس افريقيا “المغرب2025”، انقسم الشارع الرياضي المغربي، بين مؤيد للناخب الوطني وليد الركراكي ومتعاطف معه، وبين معارض له وكاين اللي طالب حتى بالرحيل ديالو من ليكيب ناسيونال وان الجامعة الملكية المغربية لكرة القدم خاصها تجري عليه كيفما، بسبب المستوى د المنتخب واخا الأسود كايربحو.

وبالعقل والمنطق ولغة النتائج كايبان ان وليد الركراكي محقق نتائج مزيانين مع المنتخب الوطني المغربي، وقدر يربح 12 ماتش متابعين مع الأسود حتى لدابا بلاما يخسر، وهذا الشي من بعد الخسران اللي كان مع جنوب إفريقيا فثمن نهائي كاس افريقيا “الكوت ديفوار2023″، والأسود ماركاو 41 هدف وتماركا عليهم 4 أهداف، مع ان انتقادات قوية توجهت للدفاع ديال ليكيب ناسيونال اللي خاصو يتخدم كثر.

1- واش اللي كايطالبو بإقالة وليد الركراكي كيفما تمت اقالة وحيد حاليلوزيتش عندهم الحق ؟

إلى شفنا شحال ديال الوقت مازال على كاس افريقيا كايبان ان اقالة الجامعة الملكية المغربية لوليد الركراكي من تدريب المنتخب الوطني المغربي قبل 5 أشهر تقريبا من كوب دافريك، كاتبقى مستبعدة بالنظر للظروف اللي كايعيشها المنتخب حاليا تحت قيادة الركراكي واللي كايعرف يتعامل مع اللاعبين وما عندوش معهم مشاكل، وحتى الوقت ما كاينش وهذا القرار راه مغامرة كبيرة واحتمال الفشل من وراه النسبة ديالو مرتفعة بزاف.

وبالمقارنة بين المنتخب الوطني المغربي مع الركراكي والمنتخب الوطني مع البوسني الفرنسي وحيد حاليلوزيتش، وكيفاش تمت اقالة الأخير قبل 3 اشهر من كاس العالم 2022، راه كاين اختلاف كبير، حيث الركراكي ضابط الفيستيير ومقرب منو اللاعبين اللي مستعدين يديرو اي حاجة على قبلو فالتيران، أما حاليلوزيتش فكانت عندو مشاكل مع لاعبين مهمين فهداك الوقت واللي كانو من الركائز بحال حكيم زياش ونصير مزراوي، وما كانش خيار آخر من غير اقالتو وهو الخيار اللي كان صعيب ولكن بان فالمونديال انه كان موفق، وملي جا الركراكي فبلاصتو عرف كيفاش يبدل الجو فالمنتخب ويخلي الگروب مجموع وشي كايكمل شي والنتيجة كانت بتحقيق انجاز الدومي فينال فكاس العالم بقطر.

2- علاش اداء المنتخب المغربي مع الركراكي ما كايقنعش وما كاينش استقرار فالتشكيلة؟ واش كاين شي مبرر يشفعل له؟

ديما اداء المنتخب المغربي نقطة مشعلة العافية بين الجمهور ووليد الركراكي واللي مخليا المنتقدين يهاجموه وبقوة، ولكن إلى شفنا ليكيب ناسيونال من مجموعة ديال الزوايا، غايبان لينا أن الركراكي عندو إكراهات كثيرة وكايحاول يتعامل معها وان المهم هو المنتخب يربح كيفما كان الأداء، وانه بهاد الإكراهات محقق النتائج، وإلى خدينا مثال الماتشات الوديين الجوج اللي فاتو ضد تونس والبنين، بان المنتخب بمستوى متوسط والركراكي براسو اعترف بهذا الشي، ولكن اكد ان عندو غيابات ديال ركائز ولاعبين مهمين داكشي علاش الاستقرار ما كاينش فالتشكيلة، وغيابات بحال ديال ديال دياز وعبد الصمد الزلزولي ونايف أگرد ونصير مزواري مؤثرين، وبالاضافة إلى ان لاعبين بقاو كايلعبو مع فرقهم حتى المراحل الأخيرة من المنافسة ويعاو بحال اشرف حكيمي وايوب الكعبي والزلزولي ومزراوي، ولاعبين اخرين كان خاص يتكايس عليهم حيث مازال لاعبين كاس العالم للاندية بحال حكيمي وسفيان رحيمي وياسين بونو باش ما يتوعتوش حيث صحتهم هي الاولى وحيث المنتخب محتاج لهم فالماتشات الجايين.

وباش تبقى العلاقة بين الجامعة الملكية المغربية والأندية ديالهم مزيانة، حيث صعيب يتوعت لاعب للفريق ديالو فماتش أميكال مع منتخب بلادو، ويتحرم النادي من الخدمات ديالو، وطبعا كيبقى المنتخب هو المهم عند اي لاعب ولكن حتى الفريق ديالو اللي كياكل منو الخبز مهم له، وطبعا العلاقات مع الاندية خاصها تبقى مزيانة حيث جايين ماتشات وديين وسط الموسم وكاس أفريقيا حتى هو وسط الموسم وغايكون الركراكي محتاج لهاد الاندية يتكايسو على اللاعبين ويطلقوهم له باش يدير التجمعات الإعدادية كيفما دار هو معهم قبل مونديال الاندية مثالا.

2- شنو أكبر ديفو عند الركراكي واللي خاصو يخدم عليه ويعالجو؟

أكبر ديفو عند وليد الركراكي هي الطريقة ديالو فالهضرة مع الجمهور والتصريحات ديالو المستفزة أمام وسائل الإعلام، حيث كايبان فكل ندوة صحافية انه كايجاوب على الاسئلة ديال الصحافيين بواحد التعالي وعصبية وغرور، بحال ملي قال انه احسن مدرب فتاريخ المغرب، وان اللاعبين بحال دياز ولاو كايختارو يلعبو مع المغرب ملي جا هو للمنتخب، وبحال ملي رد على المنتقدين ديال اداء المنتخب المغربي معه، وقال انهم كايقلبو على شي حاجة اخرى من غير اللعب وباغيين الفراجة، وهاد الطريقة ديال الكلام تقدر تخلي حتى المتعاطفين معه من الجمهور وللخدمة اللي كايدير فالمنتخب يتقلبو عليه، حيث راه ولاو المغاربة مايشوفونه بحالا فيه العياقة والثقة الزايدة من ورا كاس العالم 2022، والإنجاز اللي تحقق ديال الدومي فينال، واللي كان عندو دور فيه هو كمدرب بحالو بحال الجامعة الملكية المغربية برئاسة فوزي لقجع واللاعبين والجمهور.

وليد الركراكي خاصو يعرف دابا ان اول خصم له هو راسو ويصحح طريقة كلامو أمام وسائل الإعلام وكيفاش كايجاوب على اسئلة الصحافيين اللي كاينقلو له تساؤلات الجمهور المغربي، وانه خاصو يبدل طريقة كلامو مع المغاربة، حيث دابا المنتخب المغربي محتاج للدعم المطلق ديال گاع الشعب، اللي كايبقاو مختلفين حول طريقة اللعب، ولكن ملي كايماركي المنتخب المغربي كلشي كايفرح وملي كايخسر كلشي كايبقى فيه الحال، ودابا خاصو يجمع عليه الرأي الرياضي لمصلحة المنتخب باش يحقق الهدف المنشود وهو التتويج بكاس افريقيا 2025 بقلب المغرب وفالدار كيفما كيقول هو.