گود سبور//

كايبان ان هشام ايت منة رئيس الوداد الرياضي مازال عقلو صغير، وما باغيش يكبر واخا شد رئاسة نادي كبير بقيمة الوداد، وكايبان ان هشام ما گادش على الفرقة حيث كون كان گاد عليها ما غاديش يهرب للكلاشات مع الجمهور ديال الغريم، والحمرا مازال ما عندهاش استقرار فـ المستوى والنتائج اما التسيير راه فيلم آخر والوداد راه أولى بهاد الجهاد يصرفو فيها فـ بلاصة ما يبقى يتكلاشا مع جمهور الرجا اللي ولاو مطلعينها عليها بعبارة “ايت منة مازال كايتمنى”.

وبعدما تحسمت صفقة زياش، واخا ما تعرفش أصلا التقرير الطبي ديالها كيف داير وسط شكوك ان اللاعب موعت فـ رجليه وهذا الشي اللي خلى قيمتو تنقص ومن أوروبا والخليج يجي يلعب فـ البطولة وحتى الكونفوكاسيون ديال اللاعب وامتى غايكون مؤهل قانونيا باش يلعب، فكلشي قال من بعد هذه الصفقة ان هشام ايت منة دار عقلو وغادي يخدم الوداد، وتعلم من أغلاط الموسم الماضي وكايحاول يدير لراسو كاريزما بحال سعيد الناصيري، ولكن كايبان ان ياسين اللي فـ ايت منا ما مخليهش يكون بروفايل ديال رئيس نادي بقيمة الوداد واخا شد الرئاسة عام والصرف.

ايت منة رجع تاني كايدير داكشي اللي كان كايدير أيام كان رئيس لشباب المحمدية، والحب ديالو يتكلاشا مع جمهور الرجا، وناض يرد عليهم بعدما طلعو عليه ميساج ساخر بعد نهاية الديربي الأربعاء الماضي من فيلم ديال الفنان المغربي الرائع گاد المالح، وخرج ايت منة مع الزميلة “شوف تيفي”، وقال: “بغيت نجاوب ولكن ما قدرتش نجاوب، ما عرفتش شكون نجاوب واش هاد الترا ولا لوخرين، حتى يندامجو مع هما عندهم تجربة فالاندماج ونجاوبهم، مع دابا كاينين جوج الترات خفت نجاو هادو يكعاو لوخرين حتى يندامجو ويوليو واحد كيفما اندمجت الفرقة ونجاوبهم”.

رئيس النادي ديما كايبقى رئيس بشخصية وكاريزما قوية، وما كايتكلاشاش مع الجمهور، وايت منة اللي الحلم ديالو يولي بحال سعيد الناصيري، خاصو يدير فـ بالو ان سعيد اللي هو احسن رئيس داز فـ تاريخ الوداد ديما كان كايحترم جمهور الرجاء الرياضي، وعمرو قلل الاحترام على ناديهم بالعكس كان كايكبر بهم وبزاف ديال الرجاويين كايحتارموه واخا كايختالفو معه فـ الانتماء، وهكدا كايكون رئيس الوداد عندو شخصية قوية ومحترم حيث كايحترم الخصوم، اما اللي كايتكلاشا مع جمهور الغريم يا إما باغي يخبي الفشل ديالو والعشوائية فـ التسيير بإستعطاف البيبليك ديالو او انه بالفعل عندو عقدة وجايبها معه، والوداد دايرها غير طريق باش يحقق داكشي اللي مازال كايتمنى.