كود -وكالات //

إلى زرتي شي حديقة حيوانات، غالباً غادي تشم روايح ديال التبن والحيوانات والروث، ولكن آخر حاجة ممكن طيح فبالك هي ريحة الحشيش.

بزاف ديال جرادي الحيوانات معروفين بهاد الريحة، والسبب ماشي شي حد كيكمي، وإنما حيوان كيتسمى “الذيب بو عرف”.

هاد الحيوان، المعروف علمياً باسم Chrysocyon brachyurus، هو أكبر نوع من الكلبيات فأمريكا الجنوبية, عندو رجلين طوال بحال الغزال، ووجه قريب كي ثعلب، وجسم كيشبه للذيب، ولكن راه نوع مستقل بوحدو.

الذيب بو عرف كيعشق العزلة وكيعيش أغلب الوقت بوحدو، وباش يتواصل مع الحيوانات الأخرى أو يحدد المجال الترابي ديالو، كيستعمل البول اللي كيحمل رسائل كيميائية قوية كتقدر توصل لمسافات بعيدة.

الغريب هو أن بزاف ديال الناس اللي شمو هاد الريحة وصفوها بأنها كتشبه بزاف لريحة الحشيش، وفواحد الحادثة مشهورة سنة 2006، توصلات الشرطة الهولندية بشكايات على وجود شي حد كيكمي داخل حديقة حيوان روتردام، لكن التحريات بينات أن مصدر الريحة ما كانش إنسان، وإنما بول الذيب بو عرف.

العلماء لقاو أن السبب راجع لمركبات كيميائية كبريتية كتخلي الريحة قوية ونفاذة، وكتشبه لريحة الحشيش وبعض النباتات والفواكه الاستوائية.