الرئيسية > آراء > واش الدولة تساهلات كثر من القياس مع صحاب “خيطي بيطي”. خاص مرحلة جديدة ممنوع يخرج فيها اي فرد من العائلة الا مرة فالسيمانا واللي خرق بلا متابعة بلا والو غير الذعيرة. راه فالصبليون ضربو واحد خرج يشري 50 درهم ب6 الاف درهم 
05/04/2020 13:00 آراء

واش الدولة تساهلات كثر من القياس مع صحاب “خيطي بيطي”. خاص مرحلة جديدة ممنوع يخرج فيها اي فرد من العائلة الا مرة فالسيمانا واللي خرق بلا متابعة بلا والو غير الذعيرة. راه فالصبليون ضربو واحد خرج يشري 50 درهم ب6 الاف درهم 

واش الدولة تساهلات كثر من القياس مع صحاب “خيطي بيطي”. خاص مرحلة جديدة ممنوع يخرج فيها اي فرد من العائلة الا مرة فالسيمانا واللي خرق بلا متابعة بلا والو غير الذعيرة. راه فالصبليون ضربو واحد خرج يشري 50 درهم ب6 الاف درهم 

كود هناء ابو علي ///

الموت كيتزاد كل نهار فاللي تصابو بكورونا فيروس فالمغرب. العدد اليوم يمكن نوصلو للحالة الالف. وضع مقلق بعد ما كنا فالمغرب متحكمين فيه فالبداية. مقلق ماشي حقاش ماتو اطباء وصافي. راه فاسبانيا كثر من 12 الف من اطباء وفراملية وتقنيين فقطاع الصحة فيهم “كوروما فيروس” وماتو منهم عدد لاباس به من هاديك اكثر من 11 الف اللي قتلها هاد الفيروس. فايطاليا وفالصين وقع نفس الامر.

الاخطر هو تعامل المغاربة مع قرار حالة الطوارىء الصحية. الاحياء الشعبية ما محتارماش ابدا هاد الاجراءات. نشرنا ف”كود” صور من سباتة فكازا. سويقة عامرة بدون ادنى احتراز. لا ماسك لا ليكات لا التباعد بمترو على الاقل. قنبلة موقوتة وصافي. هاد الصورة حاضرة فاحياء. شعبية كثيرة فمدن مغربية. فحي النصر فالمحمدية نفس المشهد. المشكلة انو اكتشفو الفيروس عند عائلة. الاب اللي كان كدير الدياليز توفى ودابا كاين العزل ديال باقي افراد العائلة. دابا خاص السلطات توقف السوق كولو. المشكلة انو سوق جا بين حي النصر وحي الحسنية 2 اللي فيه بنادم بزاف. يعني ان احتمال انتقال العدوى كاين.

الاسواق فالمدن لكبيرة قنبلة موقوتة. كتضرب كاع الاجراءات اللي دارت الدولة. دابا كيفاش خاص يتعالج هاد الشي.
فالبداية السلطة دارت البيداغوجيا. شرحات ووضحات. هاد الشي ما كافيش. خاص الصرامة. خاص الغاء هادوك لوراق اللي عطاتهم الداخلية لجميع لمغاربة. يديرو بحال دول فاروبا. كل دار يخرج منها واحد لا غير. ممنوع يخرجو جوج فنفس الوقت من الدار. ثم هاد الخروج خاصو يكون مبرر وغير مرة الاسبوع وكل واحد خرج خاصو ضروري لاكارط ناسيونال.
اللي لقاوه خارج يشري كيلو ماطيشة او خيزو يعطيوه دعيرة. يخلص. لا ضرب لا اعتداء لا هدرة. ياخدو معطيات ديالو ويخلص. العقوبة ممكن تخاد من الناس اللي ماشي فحالهم من الدعم اللي غادي يتقدم ليهم. خاص كذلك التباعد. ممنوع شي حد يقرب من لاخر اقل من جوج مترو …

فاسبانيا لقاو واحد خارج وعندو تيكيت فيها 5.9 اورو يعني اكثر من خمسين درهم ضربوه بدعيرة فيها 600 اورو اي كثر من 6 الاف درهم. خاصو يخلص ويمشي للقضاء من بعد ايلى بغى.

خاص الدولة تكون صارمة. هادي حياة كاع لمغاربة. كاينين المستهترين والقانون دار لامثالهم.   بلاش العقوبات الحبسية. ضربوهم للجيب. اللي خرج يخلص ولا عاودها يفعلو اش جا فقانون الطواريء بخصوص المحاكمات.

لمغاربة راكم عرفتو اننا ايلى مشينا للعلاج غادي يموتو منا بزاف. تجهيزات الصبيطارات ناقصة وعدد الاطباء قليل. شوفو اوربا غلبها هاد المرض. الحل الوحيد الاوحد هو الوقاية. الوقاية هي تبقى فدارك بالخاطر او بزز: الدعيرة..

موضوعات أخرى

03/06/2020 21:30

تجار لحوايج فكازا كيستعجلو يرجعو يخدمو وها آش مقتارحين باش متسدش السواق مستقبلا بسبب كورونا.. ومهني لـ”كود”: تحرك المقاولات الصناعية رهين بعودة هاد القطاع للعمل

03/06/2020 21:00

تحطات ضدها شكاية بتهمة ازدراء الدين ..بوشكيوة فحوار مع “كود”: أنا ماخايفاش حيت من حقي مناقشة الدين .. وخاص تجفيف منابع التطرف من خلال برامج تعليمية متنورة

03/06/2020 20:00

بيان “الاتحاد” على “ضريبة على الثورة”. راني ماواكلش الشمع ولا النُّخالة آ بوعزة!!! گولو لينا فيمن عينيكم