كود -وكالات //

دراسة جديدة دارتها جامعة بنسلفانيا فـأمريكا لقات بأن الناس الكبار اللي كيمشيو يصوتو فـالانتخابات عندهم احتمال أقل يموتو مقارنة مع اللي ما كيصوتوش، وهاد التأثير كيبان حتى على مدة ديال لـ15 عام.

فالدراسة اللي تنشرات فمجلة علم الشيخوخة، تبّعُّو الباحثين ناس كبار فالعمر صوتو فانتخابات الرئاسة الأمريكية ديال 2008، وقارنوهم مع ناس ما صوتوش، وشافو نسبة الوفاة ديالهم بعد 5 و10 و15 عام.

النتائج بينات أن اللي صوتو كان عندهم خطر أقل ديال الوفاة، وخصوصاً الناس اللي أصلاً عندهم مشاكل صحية، حيث هما اللي استفدو أكثر مع  الوقت، ولي فشكل هو أن هاد النتيجة ما عندهاش علاقة لا بالمستوى المادي ديال الشخص، لا بالتعليم، لا بالانتماء السياسي ديالو، وحتى إلا خسر المرشح اللي صوت ليه، الفايدة كتبقى كاينة .

هادشي  كببيّن حتى أن التصويت مرتبط بعمر طويل عند الناس الكبار ، ولكن ماشي بالضرورة بسباب التصويت بوحدو ولكن حيث كيعكس الإنخراط  فالحياة المدنية، وكيعطيه إحساس بالهدف والانتماء والتحكم فمحيطو ،هاد العوامل النفسية والاجتماعية مجتمعة كتدعم الصحة وكتنقص من خطر الموت  على المدى الطويل.