كود الرباط//

علمت “كود” من مصدر مطلع بلي قيادات في حزب الأصالة والمعاصرة مبغاوش يمشيو مع التجربة ديال التحالف مع الأحرار، بل أكثر من ذلك حتى التحالف مع حزب الاستقلال رافضينو، يعني مبغاوش نجاح هاد التجربة ديال التحالف الثلاثي، وهادشي غير على بعد سنة فقط من انطلاق الصراع الانتخابي على شكون يشد رئاسة حكومة 2026.

وحسب مصادر “كود” فراه قيادات بارزة فالبام خصوصا تيار مراكش للي مسيطر على هياكل وقيادة البام، مبغاوش ينخرطو مع تجربة الأحرار، وكيفضلو يرجعو اللور، لدرجة أنهم كيروجو بلي البام خارج دائرة الصراع على رئاسة حكومة المونديال 2026.

وكشفت مصادر حزبية بلي البام مطالب باش يراجع راسو أكثر ويصحح الأخطاء لي دار، ولكن في نفس الوقت “البام داير لعبة” وخدام باستراتيجية ذكية وهي يخلي الصراع يبقا بين الأحرار والاستقلال باش يبان ف 2030 هو الحزب للي غادي يصحح تجربة حكومة المونديال.

قيادي فالبام هضر مع “كود” قال بلي هاد الحكومة الحالية مرضاتش الحزب، وحتى التعديل الحكومي جاب وزراء زادو شوهو صورة الحكومة، لذلك الحزب خدا مسافة من جوج وزراء تقنقراط بحال وزيري الصحة والتربية الوطنية، الأخير لي كتبات عليه جريدة لوموند ووصفاتو بنعوث غريبة علما أن هاد الوزير معقول ومافيه ريحة الفساد كيف هي رايجا وسط عدد من السياسيين.

البام باغي لعبة اخرى، هي الانسحاب من المشهد وبطبيعة الحال كيستناو الوحي.. أي شكون خص يدعمو ف2026 واش أخنوش ولا بركة.